مساء الخير
خلصنا كلام في البوستات اللي فاتت عن الهوك ودرسنا تسع طرق لكتابته وده اللي بيبقي موجود في اول صفحة او صفحتين من السيناريو .. وكمان السؤال الدرامي المركزي اللي بيبقي في الصفحة التالتة تقريبا وكمان انتقلنا لحاجة هي كتلة علي بعضها كده في السيناريو بتخدم غرض واحد وهي اول عشر صفحات في السيناريو شامل صفحتين الهوك وصفحة السؤال الدرامي المركزي لو ما تابعتش البوستات اللي فاتت هاتلاقي في الاخر هاشتاجات ابحث بيها وهات الموضوع من اوله ......
هاتلاقي فيه كل المواضيع القديمة وتحديثات بأستمرار
هانتكلم بقي بعد كده علي حاجة بتيجي تقريبا بعد العشر صفحات الاولي وهي الحدث المفجر او
Inciting incident
لما حضرتك بتكتب قصة بيبقي في سبب لطريقة تصرف شخصياتك سبب علشان كل الاحداث بتحصل ده بنقول عليه الدافع بس ايه اللي بيخلي الشخصية تتقدم داخل الاحداث ايه اللي بيشعل شعلة الرغبة جواهم ويلهمهم بمهمتهم اللي هايقوموا بيها علي مدار رحلة القصة او الفيلم؟؟ هو ده الحدث المفجر
الحدث المفجر هو اهم جزء في القصة لأنه هو اللي بيخلي القصة كلها تحصل اصلا .. هو ممكن يكون حدث صغير او كبير مش هاتفرق اهم حاجة يكون موجود علشان يدفع احداث القصة للأمام ويوصلنا لنقاط الحبكة اللي بتوصل بين الفصول
تغريف الحدث المفجر هو نقطة حبكة او حدث مهمته ان يشد القارئ لداخل احداث القصة ويكون سببا في رغبة الشخصية في التغير انه ذلك الحدث الذي يلهم البطل برحلته داخل القصة
وزي ما بيقول روبورت ميكي في كتابه القصة فأن تعريف الحدث المفجر هو الحدث الذي يقلب توازن القوي في حياة البطل رأسا علي عقب
The inciting incident radically upsets the balances of forces in your protagonist’s life.
قبل الحدث المفجر المفترض ان بطلك بيعيش حياة طبيعية ولكن بعده قصتك عمرها ما هاتبقي نفسها بالنسبة لبطلك
ليه بقي احدث المفجر مهم؟؟ بدون حدث مفجر لا يوجد سبب للقصة .. انت ممكن تقضي وقت طويل تحسن شخصياتك وتنقح عناصر الحبكة الاخري ولكن يبقي الحدث المفجر دون اي تغيير اثناء عملية اعادة الكتابة .. الحدث المفجر من اهميته انت لازم تحطة ضمن اللوج لاين او ما يعرف بملخص القصة في سطور
ممكن يكون الحدث المفجر شيء ايجابي بالنسبة للبطل زي انه يكسب في الياناصيب اتنين تلاتة مليون دولار او انه يتعرض عليه وظيفة جامدة بمرتب ماحصلش او انه يتعض بعنكبوت مشع .....
وممكن يكون سلبي زي ان مثلا ابوه او امه يموتوا في حادثة مثلا او ان البطل يتفصل من شغله ويرجع من الشغل بدري فيكتشف ان مراته بتخونه مع رئيسه في العمل ... او ان البطل يتم اتهامه بقتل حد من معارفه السابقين او زوجته مثلا
انواع بناء للحدث المفجر :
اول نوع من انواع الحدث المفجر حابب اتكلم عنه هو النداء للتحرك او
Call of action
في فيلم
Raiders of the Lost Ark
احنا بنبقي غارفين ان انديانا جونز مغامر ولكن الحدث المفجر في الفيلم لما رجالة المخابرات الامريكية بتطلب منه الاستيلاء علي (التابوت او السفينة) قبل ما النازيين يحطوا اديهم عليه
نوع اخر من انواع الحدث المفجر هو النوع التفاعلي لما حاجة بتحصل للبطل وهو بيتفاعل معاها فبتتغير حياته تماما ده نفس اللي حصل في بريكينج باد
Breaking Bad
بمجرد تشخيص والتر وايت واصابته بسرطان الرئة القاتل كان لزاما عليه انه يخترع طريقة ليكسب مبلغا كبيرا من المال لأعالة عائلته بعد وفاته .. ولهذا تحول الي هايسنبيرج وتوالت احداث القصة
نوع تاني من الاحداث المفجرة بيبقي عبارة عن سبب يؤدي الي سلسلة من الاحداث اللي بتؤدي في النهاية الي حدوث التغيير زي مسلسل الفتاة الجديدة
The New Girl
لما البطلة بتكتشف خيانة حبيبها وده بيعني انها لازم تسيب السكن معاه وقراراها بالانتقال مع اصدقائها لتكون هي الفتاة الجديدة
اخيرا انا حابب اتكلم عن افلام ليها اكثر من حدث مفجر زي الفيلم الرائع تيتانيك
الحدث المفجر فيه بالنسبة لجاك هو فوزه في القمار بتذكرة ركوب التيتانيك في حين ان ذهابه لروز الشابة اللي بتحاول الانتحار وانقاذها ووقوعهم في حب بعض هو حدث مفجر بالنسبة لروز العجوز علشان تروي القصة
في سبه نصايح بحب اقدمهم هنا يستحسن وجودهم في الحدث المفجر غلشان يفضل القارئ مشدود لقصتك
1- خلي حدثك المفجر في الربع الاول من قصتك او بدري اكتر ......اكيد طبعا في استثناءات بس مغظم الافلام الناجحة حصل فيها كده زي مثلا علي سبيل المثال في رواية ميزري لستيفن كينج
Misery by Stephen King
الحدث المفجر بيحصل خلال الصفحات الاولي من الوراية .. البطل بيعمل حادثة ورجله بتتكسر وبيعيش في الكوخ بتاع اني واكي وبيدرك انه مش هايقدر يحرك رجله وانه سجين .... لو الحدث المفجر اتأخر عن الربع الاول للقصة ده بيجعل القارئ يشعر بالملل ويتسائل امتي القصة هاتبدأ
2- غير حياة بطلك للأحسن ..... او الاسوء ...... في فيلم سبايدر مان في الفصل الاول من القصة بيتر باركر بيتعض من عنكبوت مشع خلال رحلة مدرسية . في صباح اليوم التالي حياة بيتر بالكامل بتتغير بيصحي يلاقي نفسه قوي جدا وبيقدر يطلع من ايده شبك عنكبوت وكل حواسه بتبقي اقوي .. بيتر عمره ما يقدر يرجع تاني لحياته القديمة بسبب الحدث المحفز ....... انت كمان ممكن تحول حياة بطلك للجحيم في رواية ميزري الدنيا اتطربقت علي نافوخ البطل الروائي بول شيلدون لما بيصحي بيكتشف انه عاجز وسجين .. وعلي الرغم من الجحيم ده بس القارئ كان مبسوط باللي بيحصل
3- ايقظ رغبة دفينة داخل بطلك ..... عندما تكتب حدثك المفجر ضع في اعتبارك ماذا يريد بطلك حتي لو كان ما يريده هذا في مستوي اللاوعي (يعني هو مش حاسس باللي هو عايزه) وخلي حدثك المفجر يصحي رغبة دفينة جواه .... لما بيتر باركر بيتعض من عنكبوت مشع ده بيصحي جواه رغبة دفينه انه مايبقاش مجرد عيل سيس هفأ كل المدرسة والناس حوالية متجاهلاه ...
4- حط في اعتبارك ذروة فيلمك واشتغل عليها بالعكس ..... خلي كل الاحداث بتصب بداية من الحدث المفجر وبناء القصة لغاية ما تكون الذروة او الكلايمكس هي النتيجة المنطقية الوحيدة للأحداث في ميزري الكاتب بول شيلدون من اسره وضربه بالهرواة (الشومة) لموته .. ده بيؤدي لأنه كان عنده رغبة انه يموت مع الألة الكاتبة بتاعته
5- اجبر بطلك انه يتفاعل مع الحدث المفجر ..... الحدث المفجر الناجح بينجح انه يقلب توازن حياة بطلك القديمة لدرجة انه يستحيل مع حدوث الحدث المفجر انه يرجع يعيش حياته القديمة ... ازاي بيتر باركر يكمل حياته كتلميذ عادي في حين انه يملك معارات تمكنه من محاربة الجريمة وكمان تخلي البطلة اللي هو بيحبها تبادله نفس الشعور
6- اكتب حدث وحيد سهل تذكره بيحصل لبطلك ..... لما تيجي تكتب الحدث المغجر اسأل نفسك هل الحدث ده يعني حاجة بالنسبة للبطل .. وهل القارئ هايفتكر الحدث ده بعد ما يحصل وتمر احداث القصة ولا لأ ..... من الصعب جدا علي البطل او الجمهور تناسي فكرة ان بيتر باركر اتعض من عنكبوت مشع .. لأن الحدث ده هو اللي بيشكل القصة كلها
7- ابدأ صراع ... كل القصص العظيمة تحتوي علي صراع والحدث المفجر هو الشرارة اللي بتشعل الصراع ده .... اطلاق النار علي دون فيتو كرليوني بيقود مايكل نحو حرب عصابات عنيفة وتقريبا بتمزق عيلته تماما
اكيد طبعا انت ممكن تكسر كل القواعد اللي فوق وتعمل برضه حدث مفجر يشد الجمهور ولكن اساتذة القصة بتقول انك لازم تكون علي علم بالقواعد علشان تقدر تكسرها
قبل ما انهي كلامي هاديك عشرين مثال او فكرة لأحداث مفجرة ممكن توظفهم في فيلمك او روايتك
بطلك رجله اتكسرت
بطلك لقي شنطة فيها مليون دولار
الدكتور بتاع البطل بتاعك بيقول انه فاضل له تلات شهور ويموت
بطلك اتفصل من شغله
بطلك بينتقل لمدينة او دولة جديدة
بطلك بيكتشف ان شريك حياته علي علاقة بحد تاني
بطلك بيهرب من البيت
بطلك شريك حياته بيطلب الانفصال
صديق بطلك الحميم بيخونه
بطلك بيحاول يتقرب من حبيب قديم والحبيب القديم ده لسة بيحبه
واحد من اقرب الناس لبطلك بيموت
بطلك بيبدأ وظيفة جديدة
بطلك بيجيله رئيس جديد في العمل
بطلك بيترقي
عربية بطلك بتتعطل في منتصف اللامكان
بطلك بيتم احتجازه وسط كارثة طبيعية
بطلك او بنته او حد قريب منه بيتم اختطافه
طفل بطلك بيتوه منه اثناء ما بيتسوق او في المولد
بطلك بيكتشف ان في حد بيترصده
بيت بطلك بيتحرق في منتصف الليل
وبكده ينتهي كلامنا عن رابع عنصر من حيث الترتيب بيجي في سيناريو الفيلم الطويل الا وهو الحدث المفجر ... ياريت لو في حاجة مش واضحة عرفوني
وماتنسوش بقي الشير علشان الناس تستفيد والكومنتات علشان نتناقش في المكتوب
#محمود_ابو_العلا
#الحدث_المفجر
#Inciting_incident
#موفينيل
#movinel
تعليقات
إرسال تعليق