رابع وخامس طريقة من طرق كتابة افتتاحيات الأفلام - the hook 3

مساء الخير
هانتكلم النهاردة عن رابع وخامس طريقة من طرق افتتاحيات الافلام او الهوك .. لو انت ما قريتش الجزء السابق اللينك هاتلاقيه في اول تعليق عالبوست
4- المفارقة
رابع طريقة من طرق افتتاحيات الافلام هي طريقة المفارقة وفيها بنقدم للمشاهد موقف محير فيه تصرفين لنفس الشخص متعارضين ومتناقضين ولا يمكن تفسير تعارضهم ده الا بمشاهدة الفيلم طبعا

علي سبيل المثال في فيلم كارمر ضد كارمر
Kramer vs. Kramer
في بداية الفيلم الكاتب بيستخدم التكنيك ده ... بنشوف لقطة قريبة لجوانا الام الحنون بتدس ابنها بيلي في الفراش وبتقول له انها بتحبه بعدها مباشرة بنشوف مشهد ليها وهي بتشيل شنطها وبتوشك انها تسيب البيت
تجاور العنصرين دول في السيناريو بيخلق مفارقة صغيرة بتخلي المشاهد في حيرة هل هي بتحب الولد فعلا زي ما قالت؟؟ له طيب ليه بقي هاتسيبه؟؟ ولا هي مش بتحبه؟؟ طيب يبقي ليه من الاول قالت له انها بتحبه؟؟
في فيلم سيربيكو
Serpico
السيناريو بيبدأ بالضابط فرانك سيربيكو اللي بيصارع الموت في عربية اسعاف لأنه مصاب في رأسه بطلق ناري وبنقطع مباشرة علي مشهد لقسم شرطة وتليفون بيرن الظابط المناوب بيرد بيسمع كلام في التليفون وبعد كده بيلتفت لظابط جنبه وبيقول له تخيل مين اتصاب النهاردة ... سيربيكو بيرد التاني بيقوله هل تعتقد ان شرطي هو اللي عملها ؟ ... بيرد المناوب بيقوله انا اعرف ستة قالوا انهم يتمنوا يعملوا كده ...
نفس الموضوع بيوصل لنا معلومتين متعارضتين لو واحدة صحيحة التانية لازم تبقي غلط يا اما سيربيكو اللي قتله شرطي ... يبقي معني كده ان قسم الشرطة كله ناس فاسدة ... يا اما مش شرطي اللي قتله .... يبقي ليه بقي الظابط شاكك في كده؟؟
اي قناعة هاتوصل لها هاتبقي مشوشة ومش اكيدة وده بيخلق مفارقة بتخلينا مرتبكين ومتشوقين نكمل الفيلم
5- كسر النمط
خامس طريقة من طرق افتتاحيات الافلام هي طريقة كسر النمط  وزي ما اتفقنا في اول حلقة ان الفضول هو اساس كل البدايات فالمفاجأة احد اهم دعاماتها .. المفاجأة بتظهر لما انت في السيناريو بتاعك بتكسر نمط متعارف عليه
علشان المفاجاة تكون فعالة لازم تأسس لموقف او عالم عادي وبعد كده مباشرة تكسره بحاجة متناقصة .. هو ده اللي بيخلق المفاجأة .. المفاجأة مش بتبقي في الموقف نفسه ولكنها بتبقي في سياق الموقف مع ما قبله ... انت بتخلي المشاهد يتخيل انه فاهم الدنيا ماشية ازاي وبعد لحظات بيظهر ان الاشياء ليست كما تبدو عليه ... ده هايخلي المشاهد يفضل منتبه ومكمل في الاحداث
عارف انا ان الكلام شكله صعب ومش مفهوم خلينا نضرب مثال علشان نقرب المعلومة اكتر 

في افتتاحية غريبة لفيلم اين بوبا؟
Where’s Poppa?
بنشوف راجل اللي هو اليوت جولد بيصحي من النوم بسبب جرس المنبه بتاعه بيقوم يقلع ويروح ياخد شاور ويرجع لدولابه علشان يطلع طقم يلبسه .. كل ده عادي جدا ... لكننا بنتفاجئ انه بدل ما يطلع بدلة يلبسها مثلا بنلاقيه بيلبس زي تنكري علي شكل غوريلا ؟؟؟
علي الرغم من ان كسر النمط مش بالضرورة يكون واضح قوي كده وده اللي بيخليه ممكن يكون مناسب لأي قصة
في افتتاحية فيلم القمر الورقي
Paper Moon
بيلعبها بطريقة اصيع واهدي كتير بيبدأ الفيلم في حقل في مكان ما بولاية كانساس ومجموعة من المعزيين متجمعين في جنازة عادية .. بنشوف ونسمع عربية قديمة بتقرب للجنازة بينزل منها راجل وبيتجه مباشرة للجنازة بنفهم من هيئته انه متأخر علي الجنازة بيعدي علي احد القبور بيقوم سارق زهور من عليه .. حاجة بسيطة بس مهمة بنعمل بيها كشف لسمة شخصية عن طريق كسر نمط طبيعي
ممكن كمان تبقي درامية جدا زي افتتاحية فيلم .. ادب شعبي
Pulp Fiction
اتنين بيتغدوا في مطعم في ما يبدو انهم وسط محادثة عديمة الاهمية لحين ما فجاة الاتنين بيرفعوا مسدساتهم علي بعض وبيثبتوا بعض
كسر النمط بيخلينا مفتونين بالفيلم وبنتابعه بشغف ويكأن كاتب السيناريو بيوجه رسالة للمشاهد بيقول له (انت متخيل انك عارف القصة بتحكي عن ايه بس بجد وجداني انت معندكش اي معلومة)
دول رابع وخامس طريقة من طرق كتابة بدايات الافلام او كما يطلق عليها الخطاف وهانذكر الباقي تباعا وبعد كده هاننشر حلقة ملخصة للتسع طرق وبعد كده ننتقل لنقطة تانية
ماتنسوش بقي الشير علشان الناس تستفيد والكومنتات علشان نتناقش في المكتوب
#محمود_ابو_العلا
#الهوك
#the_hook
#موفينيل
#movinel