سادس وسابع طريقة من طرق كتابة افتتاحيات الأفلام -the hook 4

مساء الخير
سبق لينا قبل كده الكلام عن خمس طرق من الطرق الشائعة لافتتاحيات الافلام هانتكلم النهاردة عن سادس وسابع طريقة من طرق افتتاحيات الافلام او الهوك .. لو انت ما قريتش الجزء السابق اللينك هاتلاقيه في اول تعليق عالبوست
6 - الافتتاحية المبهمة
سادس نوع من انواع افتتاحيات الافلام هي الافتتاحية المبهمة ودي تشبه الي حد ما الافتتاحية الغامضة بس انت لازم تعرف تفرق بينهم.
 في الافتتاحية المبهمة بنقدم صورة بتتحدي كل التفسيرات .. هي لا تثير تساؤلات زي الافتتاحية الغامضة بسبب ان كل حاجة واضحة قدامنا مفيش اي حاجة مخفية لغرض درامي .. كل شيء واضح في الكادر بس اللي احنا بنبقي شايفينه بيتحدي التفسير 

ده نفس الاسلوب اللي اتبعه كاتب السيناريو في افتتاحية فيلم شكل المياة
The shape of water
الفيلم بيبدأ بمنظر لشقة كاملة تحت المية . وبيسبنا نتسائل ما اذا كان ده حدث حقيقي ؟؟ هل الشقة مغمورة بالمياة فعلا؟؟ هل كان في فيضان؟؟
وبمتابعتنا الفرجة بتظهر اليسا بتطفو برفق فوق سريرها وعندها بنفهم اننا مش بنشوف حادثة ولكنه مشهد غريب سريالي
في افتتاحية من النوع ده فيلم شكل المياة بيوظف تكنيك قديم من الافتتاحيات المبهمة  زي
فيلم 2001 لكوبريك
وماجنوليا لبول توماس اندرسون
و(لا دولشي فيتا) لفيلليني
7- الافتتاحية الموضوعية
الافتتاحية دي بتعتمد علي تيمة الفيلم نفسها علشان تخلينا متشوقين للفرجة عالفيلم .. اساس عملها هي فرضية ان لو التيمة لوحدها مستفزة للفكر او مثيرة للجدل بما فيه الكفاية اذن فهي تصلح انها تكون خطاف او هوك
تيمة زي مثلا الجريمة لا تفيد مش هاتبقي مناسبة قوي لافتتاحيات  من النوع ده
وبما ان التيمة لا تشرح وتفسر نفسها علشان نحافظ علي تشوقنا اننا نشوف الفيلم (وفي تناقض مع كل ما اتعلمناه في كتابة السيناريو) الافعال لوحدها مش هاتقدر تنقل التيمة بشكل واضح كفاية علشان التيمة تبقي صالحة انها تستخدم كخطاف علشان كده بنحتاج نصيغ التيمة علي شكل جمل قوية منمقة علشان نقدر نشد بيها الجمهور
صدعتكوا انا عارف والامور ابتدت تتوه خلينا ناخد مثال نفهم منه الدنيا ماشية ازاي 

في الفيلم الشهير الاب الروحي
God father
بنفتتح الفيلم بمشهد لبوناسيرا رجل في منتصف العمر بيكلم الكاميرا مباشرة وهو بيقول .. انا اؤمن بامريكا .. امريكا هي من صنعت لي الثروة ....
الكلمات دي قد تبدو مبتذلة (كليشيهات) ولكن ادراكك للسياق اللي بتتقال فيه بتدرك قد ايه هي قوية لأنها ببساطة بتتقال بواسطة رجل فاقد الثقة بالنظام وبيتعهد بشكل يائس بالولاء للجريمة المنظمة لأنها طريقه الوحيد لتحقيق العدالة . التخيل ده لأمريكا كبلد (الفساد فيه اصبح هو المعيار) .. قدر يتغلل في كل احداث الفيلم من اللحظات الاولي وحتي المشهد الاخير
بالصدفة لما كوبولا مخرج فيلم الاب الروحي اتطلب منه يخرج الفيلم ده كان رده في الاول هو الرفض بما انه ايطالي الجنسية ماحبش انه يساهم في فيلم بيشارك في تنميط صورة الاميريكان من اصل ايطالي وتصويرهم علي انهم رجال عصابات ولكنه لما فكر مرة تانية رجع للمخرج وقال له انه ممكن يعمل الفيلم ده في حالة ما اذا كان مسموح له انه يحوله لمجاز واستعارة عن الولايات المتحدة الامريكية وافق المنتج علشان كده بقي عندنا الفيلم ده  بالافتتاحية دي
كوبولا كان له افتتاحية موضوعية ايضا لسيناريو فيلم باتون
Patton
اللي افتتحه برضة بمونولوج موضوعي

لما باتون (الشخصية البطل في الفيلم كانت بتقول) عايزك تفتكر ان عمر مافي واحد (ابن تييت) كسب حرب عن طريق انه مات فيها فداء لوطنه ... هو بيكسب لما بيقدر يقنع ناس تانية غلابة وأغبيا تموت فداءاً لوطنه .... كل ما يثار حوالين ان امريكا مش ناوية تحارب عبارة عن هري فاضي ... الاميريكان بطبعهم بيحبوا يحاربوا

دول سادس وسابع طريقة من طرق كتابة بدايات الافلام او كما يطلق عليها الخطاف وهانذكر الباقي تباعا وبعد كده هاننشر حلقة ملخصة للتسع طرق وبعد كده ننتقل لنقطة تانية
ماتنسوش بقي الشير علشان الناس تستفيد والكومنتات علشان نتناقش في المكتوب
#محمود_ابو_العلا
#الهوك
#the_hook
#موفينيل
#movinel