ثامن وتاسع طريقة من طرق كتابة افتتاحيات الأفلام - the hook 5

مساء الخير
سبق لينا قبل كده الكلام عن سبع طرق من الطرق الشائعة لافتتاحيات الافلام هانتكلم النهاردة عن ثامن وتاسع طريقة من طرق افتتاحيات الافلام او الهوك .. لو انت ما قريتش الجزء السابق اللينك هاتلاقيه في اول تعليق عالبوست
8- السر
ثامن نوع من انواع افتتاحيات الافلام هي الافتتاحية السر ...  للأسرار القدرة علي ان تسحبنا وتشدنا نحو احداث الفيلم ... ولكن المفارقة انك بالطبع لا بد ان تعرف ان هناك سرا قبل ان تتمكن هذة الحقيقة من اجتذابك .... في كثير من الاحيان محاولات كتاب السيناريو للأيحاء بوجود سر قد تفشل لأن كتاب السيناريو قد يعتبرون تاسيس سر هو امر سهل ... ولكنك لكي تؤسس لسر ما تحتاج الي ثلاثة اشياء
أ‌- ان هناك شيء ما يحدث
ب‌- ان هذا الشئ مهم للقصة
ت‌- ان هذا الشئ مخفي
والثلاثة عوامل علي قدر كبير من الاهمية ولا بد من تواجدهم جميعا 

هذا النوع من الافتتاحيات استخدم في احد الافلام (الذي تعتبر افتتاحيته احد اشهر افتتاحيات الافلام علي مر العصور) وهو فيلم المواطن كين
من اللقطة الاولي والتي توضح لافتة مكتوب عليها ممنوع المرور والمشاهد بيتم تجهيزه لكي يدرك ان هناك شيء ما تم اخفائه عنه. المشهد بعدها يظهر لنا القصر الغامض وبداخله نري رجلا يلفظ انفاسه الاخيرة قائلا برعم الزهرة (روز بد ) دون اي تفسير لمعني هذة الكلمات
عندنا هنا التلات عوامل بنعرف ان في سر متعلق بالكلمة اللي نطقها ... وبنعرف انها مهمة لأنها كانت كلمته الاخيرة .. وتم اخفاء معناها او فايدتها عننا لأنه مات .... والتلات عوامل دول اللي بيصنعوا السر
افتتاحية الفيلم الاصلي جومانجي من انتاج 1995
Jumanji
 بتستخدم نفس الاسلوب ... اول مشهد بيفتح علي شاطئ الكاميرا بتقرب علي انتفاخ  في الرمل وبنسمع منها صوت ضربات طبول .. طفل بيمشي علي مقربة بيحفر في الرمل وبيكشف صندوق شكله عجيب وده بيخلينا نسأل نفسنا ايه اللي جوا الصندوق ده؟
 في المثال ده الانتفاخ او النتوء اللي في الرمل ده بيخلينا نعرف ان في حاجة في المكان ده .. صوت الطبول بينبهنا لأهميتها ... وحقيقة ان محتوي الصندوق ماظهرش بيؤسس العامل الاخير في التلات عوامل المطلوبين لتأسيس سر

9- الحدث المفجر

احتفظت بالطريقة دي لأفتتاح الفيلم للأخر لكونها مهمة جدا .. الا وهي افتتاح الفيلم بالحدث المفجر ... طبعا هانتكلم بالتفصيل عن الحدث المفجر لما يجي وقته لكن خلينا نعرف دلوقت ان الحدث المفجر هو الحدث اللي يدفع القصة كلها لأن تتحرك .. هو الدفعة الاولي اللي بتسبب ان كل الاحداث اللاحقة انها تحصل اصلا .. عارف انت لما بترص قطع الدومينو في صف ورا بعض لما اول قطعة دومينو بتقع بتسبب ان بقية القطع تقع واحدة تلو الاخري لغاية اخر واحدة في الصف .. الحدث المفجر هو وقوع اول قطعة دومينو .. وعندما تسقط اخر قطعة تنتهي القصة
في قاعدة عامة بتقول انك بقدر الامكان حاول تبدا السيناريو بتاعك بالحدث المفجر .. وفي عدد كبير من كتاب السيناريو العظماء بيعملوا كده بس في الحالات دي الحدث المفجر لازم يكون قوي بما فيه الكفاية علشان يصلح استخدامه كخطاف .. طيب لو مش قوي بما فيه الكفاية؟؟ حتي لو هاتبدأ بيه لازم تحتاج معاه خطاف علشان تحافظ علي استمرار تشوق المشاهد للقصة لغاية الوصول للحدث المفجر اللي بيكمل المهمة
طبعا انواع الحدث المفجر كتير ممكن يوصلوا لحداشر نوع عالاقل .. بس علشان مانخرجش برة الموضوع هانتكلم عن نوع واحد بس منهم وهانتكلم عن الانواع التانية لما تيجي نقطة الحدث المفجر .. هانركز النهاردة علي واحد من اهم انواع الحدث المفجر الا وهو الفقدان .. وفيه البطل بيضيع منه حد او شيء
في بلاك بانثر تشاكا الصغير بيقتل اخوه نجوبو
في بريزونر البطل بيفقد بنته
في مانشستر باي ذا سي اخو البطل بيموت
في اي تي الفضائي الصغير بيفقد وطنه
في بداية كارمر ضد كارمر تيد بيفقد زوجته
في بداية فيلم غاندي .. غاندي بيفقد حياته
في هانج اوفر التلات اصدقاء بيفقدوا العريس
في ذا اود كابل فليكسي بيفقد زواجه وبيته
في ذا بيسكل ثيف انتوني بيفقد دراجته
في روكي روكي بيفقد عضويته في نادي الملاكمة
في سنو وايت و بامبي وموجلي ودامبو وبنوكيو وال 101 دالميشانز بيفقدوا عائلاتهم
الفقدان مش بس اكتر اشكال الاحداث استخداما في الادب بل انه هو مركز الطريق اللي اتشكل بيه الادب ... من الاساطير اليونانية وحتي يومنا هذا وفي كل نوعيات الافلام
الفقد امر مركزي في كل القصص الدرامية وعلي الرغم من انه مش الحاجة الوحيدة اللي ممكن اعمل بيها حدث مفجر الا ان كل الانواع التانية لازم تتحول في النهاية لفقد علشان تبقي فعالة كقصة درامية

السر الحقيقي وراء كتابة افتتاحية عظيمة لفيلمك

ان كتابة سيناريو الفيلم الطويل تشبه الي حد كبير التخطيط لرحلة .. السر الحقيقي يكمن في معرفتك بوجهتك النهائية قبل ان تقرر من اين ستبدأ
احسن البدايات هي التي تأخذنا في رحلة لا وجهة لها الا للنهاية التي اخترناها .. علشان كده بعض كتاب السيناريو بيسموا مشهد النهاية بأسم (المشهد الحتمي) وزي ما قال عمنا ارسطو ان النهاية هي النتيجة الحتمية للبداية اللي اختارناها .. حيث تفتح البداية جرحا لا يلتئم الا بالمشهد النهائي
علي سبيل المثال فان نهاية فيلم الفك المفترس بتورينا وتوضح لنا ازاي القرش اخيرا بيواجه مصيره لما حدث في الافتتاحية لما بنشوفه بيفترس امرأة بريئة
فكانت البداية هي الفعل وجائت النهاية لتمثل لنا رد الفعل وكأنها تقول لنا ان من عاش بالسيف مات به وبناء عليه فأن كتاب السيناريو الذين يعرفون جيدا نهايات افلامهم هم القادرون علي كتابة افتتاحيات عظيمة
دول تامن وتاسع طريقة من طرق كتابة بدايات الافلام او كما يطلق عليها الخطاف
تحبوا الحلقة الجاية تبقي ملخص للتسع طرق وتجميعة لهم في بوست واحد ولا ندخل في نقطة جديدة؟؟ سيب اجابتك في تعليق وهاناخد برأي الاغلبية
وماتنسوش بقي الشير علشان الناس تستفيد والكومنتات علشان نتناقش في المكتوب
#محمود_ابو_العلا
#الهوك
#the_hook
#موفينيل
#movinel