ازاي تعمل عنوان لفيلمك او مسلسل او رواية من تأليفك؟Movies and series titles 2

ازاي تعمل عنوان لفيلمك او مسلسل او رواية من تأليفك؟

Movies and series titles

مساء الخير عليكوا واهلا ومرحبا بيكوا ولقاء بيتجدد ديما عن كتابة الأفلام
النهاردة هانتكلم عن حاجة من الحاجات المهمة جدا ... اللي تقريبا مسكوت عنها تماما ومحدش بيقرب منها او يتكلم فيها ... والسهلة بالنسبة لناس كتير وصعبة جدا لناس اكتر وكما هي العادة هانمسكها ونفككها ونحاول نلاقي لها قواعد سهلة الأتباع بحيث اننا نعرف نتقنها ونطلع منها بنتايج احترافية
هانتكلم عن ازاي تجيب عنوان فيلمك او المسلسل بتاعك او رواية من تأليفك

اسم الفيلم المبني علي شخصية في الفيلم

ببساطة سمي عملك علي اسم شخصية جوا الفيلم سواء البطل او الشرير مع تنويعة علي هو مين وبيعمل ايه ... الخ .... زي مثلا
حسن طيارة.... واحد اسمه حسن وشغال سواق وبيحصل له مشاكل بسبب مهنته
زوجة رجل مهم ... معاناة زوجة رجل مريض بالسلطة
سواق الأتوبيس .. بطل الأحداث سواق اتوبيس نقل عام
الزوجة التانية .. حيلة زوجة ثانية للأنتقام ممن اجبرها علي الطلاق من زوجها وجعلها زوجة تانية
احلام هند وكاميليا .... هند وكاميليا اللي بتوصل بيهم القناعة ان مفيش راجل هايعتمدوا عليه وهايعتمدوا علي بعض علشان يحققوا احلامهم ويربوا بنت واحدة فيهم اسمها احلام
بيبي درايفر .. واحد اسمه بيبي وشغال سواق
النمر الأسود ..... واحد مقاتل ولونه اسمر
حراس المجرة .... الفيلم بيتكلم عن مجموعة اكتر منه شخص واحد والعنوان بيصرخ بالخيال العلمي والأكشن والمغامرة
طايع ... البطل اسمه طايع وفي تناقض بين سلوكه واسمه لأنه طول الفيلم عاصي (وليس مطيع) علي اصحاب النفوذ اللي حواليه

اسم فيلم مبني علي مكان الأحداث

اسلوب فعال ايضا بنفس فاعلية الأسم المبني علي اسم شخصية هو الأسم المبني علي مكان الأحداث .. ممكن ييبقي مكان عام او محدد ... حقيقي او مختلق من اجل الفيلم بس ...زي مثلا
شقة العجوزة .. معظم الأحداث بتحصل في شقة في حي العجوزة
باب الحديد ... مش محتاج كلام كتير
الكيت كات .... شرحه
ارض الخوف .... مكان تخيلي بتحصل فيه الأحداث بتعكس مشاعر تقريبا كل الشخصيات في الفيلم
القاهرة والناس ..... مش محتاج شرح
كزابلانكا ... الفلمين العربي والانجليزي بنفس الأسم وعنوانهم بؤدي نفس الغرض
21 Jump Street
جسر الجواسيس Bridge of Spies
الممر  هنا ممر افتراضي
اغنية عالممر ... هنا ممر حقيقي
الغرفة .... room  ... اسم عبقري من كلمة واحدة مش بس بيقول مكان الأحداث ولكنه بيعكس نواة الصراع جوا الفيلم .. الفيلم قدر يحتفظ بنفس عنوان الرواية المأخوذ عنها السيناريو لأنه برنس في نفسه

اسم فيلم مبني علي احساس او شعور او موقف

اخيرا ممكن تلخص فكرة فيلمك وتعصره في رحيق هايكون عبارة عن احساس شخصية البطل او موقف وجد نفسه فيه والنوعية دي بتوجه المشاهد او القارئ نحو صورة اكثر تركيزا للعمل ... زي مثلا
بئر الحرمان
لا انام
بابا عريس
عقدة الخواجة
الحياة منتهي اللذة
الحالة ج
لا تتنفس .. Don’t Breathe تلاث مراهقين بيقتحموا بيت كفيف عائد من حرب الخليج بغرض سرقته لكنه بيحتجزهم .. ايه انسب جملة تناسب وضعهم وهما بيلفوا في البيت بيحاولوا ما يطلعوش صوت ... لو جينا نترجم اسم فيلم زي ده بالعربي وحاجة تكون تشد هانقول ايه؟؟ ولا نفس ... مثلا
امشطلعبرا .. Get Out حاجة برضه شبه لا تتنفس حيث يعمل العنوان كتحذير للبطل وفي نفس الوقت نداء لأي حد بيقرأ السيناريو علشان يعرف مين المفروض يطلع من ايه
خلينا نشوف بعض العناوين اللي بتكسر القواعد اللي فاتت وكانت ناجحة زي
لن اعيش في جلباب ابي
من الذي لا يحب فاطمة
يا رجال العالم اتحدوا
راجل وست ستات
يا عزيزي كلنا لصوص
علي من نطلق الرصاص
عودة الابن الضال
وبكده يكون كلامنا انتهي عن الجزء الثاني من موضوع عنوان عملك يارب اكون قدرت افيدكوا ومش محتاج افكركوا زي كل مرة بالشير علشان اكبر عدد من الناس تستفيد والليكات علشان بتساعد في وصول الموضوع لعدد اكبر والكومنتات علشان نتناقش سوا وياريت تشاركنا بأسماء افلام انت شايف انها كانت عبقرية وتقول لنا انت بتجيب عناوين اعمالك منين وازاي؟؟
لو حابب تكمل قراية ادخل علي اللينك ده من : هنا
#موفينيل
#movinel
#عناوين_الأفلام_والمسلسلات
#Movies_and_series_titles
#title-2
#العنوان-2