ازاي تعمل عنوان لفيلمك او مسلسل او رواية من تأليفك؟
Movies and series titles
مساء الخير عليكوا واهلا ومرحبا بيكوا ولقاء بيتجدد ديما عن كتابة الأفلامالنهاردة هانتكلم عن حاجة من الحاجات المهمة جدا ... اللي تقريبا مسكوت عنها تماما ومحدش بيقرب منها او يتكلم فيها ... والسهلة بالنسبة لناس كتير وصعبة جدا لناس اكتر وكما هي العادة هانمسكها ونفككها ونحاول نلاقي لها قواعد سهلة الأتباع بحيث اننا نعرف نتقنها ونطلع منها بنتايج احترافية
هانتكلم عن ازاي تجيب عنوان فيلمك او المسلسل بتاعك او رواية من تأليفك
لو حابب تكتب عنوان جامد لعملك اظن هايبقي غلط كبير انك تلتزم بس بالتلات انواع المذكورين قبل كده ... امال ايه يا عم انت؟؟ انت هاتحيرنا ليه؟
ازاي تستقر علي عنوان لأعمالك ممكن يكون لطيف؟؟
- حط في دماغك ان العنوان اللي انت هاتحطه مهما كان متعوب عليه وارد انه يتغير اثناء مراحل صناعة العمل قبل ما يوصل وجهته النهائية ويتعرض ولكن ده لا يعني بالضرورة انك تطلسأ العنوان وتسميه رضا علي اسم جده
- اسماء الأعمال لازم تختبر بشكل وافي وجيد جدا قبل الأستقرار علي حاجة منهم ... ازاي بقي تختبر اسم العمل بتاعك
- اعمل عصف ذهني لمجموعة من الأسماء واحتفظ بيها لأن اللي مش هايبقي مناسب قوي للعمل ده ممكن يبقي مناسب قوي لعمل تاني
- هات اكبر قدر ممكن من الاسماء التجارية اللي تشد للعمل بتاعك واعمل بيهم قايمة علي الأقل بعشر اسماء مقترحة للعمل بتاعك
- باستخدام التباديل والتوافيق والحذف والتعديل هات اقرب تلات اسماء لدماغ العمل بتاعك واعمل حسابك يكون فيهم علي الأقل واحد من الأنواع اللي اتكلمنا فيهم قبل كده
- اعمل استطلاعات رأي للأسماء اللي في دماغك
1- اعرض العناوين علي كتاب تعرفهم .... زملاء الدراسة .... افراد العائلة ... الخ اديهم اللوج لاين واطلب منهم يرتبوا الأسماء بالأقرب فالأبعد
2- اعرض العناوين علي ناس ماتعرفهمش واعرف منهم رأيهم في اكتر العناوين المحببة ليهم ... حط الأسامي في جروبات خاصة بكتابة السيناريو وشوف رأي الناس ايه
3- لو ليك علاقة بقارئ محترف او محلل سيناريو اسأله رأيه في الاسماء (لو حد حابب ياخد رأيي انا تحت امره طبعا ) طبعا الخدمة دي انا بقدمها فور فريك في الأول لما نشوف الأقبال هايبقي عامل ازاي
كل ما سبق هايديك فكرة راسخة ايه العناوين الشغالة وايه اللي مش شغال وايه محتاج شغل وبناء عليه تقدر تظبط الأسماء اكتر وفي النهاية تقدر تحدد انت هاتختار ايه بالظبط
ملحوظة بقي علي حتة (عنوان مؤقت)
انت لما بتسجل عملك بأسم ما بتكتب جنبه عنوان مؤقت علشان احتمالية انه يتغير في المستقبل لكن لما تقدم الغمل حاول ماتكتبش جنبه انه اسم مؤقت علي اساس ما تنقلش احساس بالتردد او بأن الشغل في السيناريو لسة ماخلصش او انك لسة بتفكر في الموضوع ومأخدتش فيه قرار نهائي .... بدل كده خد وقتك في التفكير واطلع بعنوان فاخر من الأخر واجبر كل الناس انها تختاره قبل ما تفكر تبعته لحد
صفحة عنوان العمل
في كلام كتير حوالين الصفحة بس اهم حاجات هانتكلم فيها هي الأتي
- عنوان العمل بيبقي في النص علي بعد تقريبا عشرة سم من الحافة العلوية للورقة الأولي ويبقي بفونت كبير ومن غير زخارف كتير اهم حاجة عندنا الوضوح ويستحسن يكون تراديشونال اربيك او اريال
- خد بالك من علامات ترقيم العنوان وقواعد اللغة والأملاء السليمة علشان ممكن يخلي معناه يروح في حتة تانية خالص انت مش عايزها
مثلا اسم فيلم ...(اغنية علي الممر)... بيوحي ان الفيلم حوالين اغنية تم تأليفها وتلحينها والناس قاعدة بتحرس ممر ما اثناء الحرب لكن لو اتكتب بالشكل ده .. (اغنية .. علي الممر) ... هايدي ايحاء ان الأغنية اسمها علي الممر وفيش علاقة بين الأسم ومكان حدوث الأحداث
- الاسامي بقي .. تحت اسم الفيلم بأربع سطور ممكن تكتب تأليف ... سيناريو وحوار ... او بالانجليزي by او written by
- مش مهم تكتب قصة وسيناريو وحوار لأن كل ده يغني عنه تأليف وبعد كده في سطر لوحده اسمك
- لو في اكتر من واحد مشتركين في الكتابة بتكتب الأسامي في سطر واحد جنب بعض او في سطرين فوق بعض بدون فواصل لو حطين بينهم حرف واو مثلا في سطر يفصل الأسمين ده بيدي ايحاء ان التاني جه يعمل عملية اعادة كتابة لشغل الأولاني
- لو في اكتر من واحد اشترك في العمل وكل واحد له شغلانة مختلفة كل واحد بيقي في سطرين وورا بعض التلاتة
قصة
فلان الفلاني
سيناريو
علان العلاني
حوار
ترتان الترتاني
- لو عمل مأخوذ عن رواية مثلا بتكتب مأخوذ عن رواية كذا او مسرحية كذا للكاتب الفلاني- بعد كده بيجي دور معلومات الأتصال
في اخر سطرين ناحية الشمال بتكتب الأيميل بتاعك وياريت يكون ايميل جاد فيه اسمك بس شغل بنوتة حلوة آت جيميل دوت كوم او شاب جامد جدا آت ياهو دوت كوم بيدي ايحاءات مش لطيفة
- بلاش تحط في الصفحة الأولي تواريخ او رقم المسودة علشان لو الموضوع اتأخر في التسويق ماتديش ايحاء ان العمل قديم وهايحتاج يتعدل
بلاش حتة جميع الحقوق محفوظة لأنها بتدي ايحاء ان مفيش ثقة بينك وبين اللي باعت له النص والمفروض انها حاجة بديهية بس ممكن تحط صفة تسجيل السيناريو او تسجيل الرقابة في الصفحة اللي بعد الصفحة الأولي علشان تطمن المنتج ان العمل مفيهوش اي محاذير رقابية او تطمنه ان العمل مسجل علشان بعض المنتجين المحترمين بيرفضوا يقروا اعمال غير مسجلة منعا للقيل والقال والدخول في مهاترات لا طائل منها
لو حابب تحمل تموذج لأول صفحة من السيناريو بتاعك تقدر تحملها من : هنا
وبكده يكون كلامنا انتهي عن موضوع عنوان عملك يارب اكون قدرت افيدكوا ومش محتاج افكركوا زي كل مرة بالشير علشان اكبر عدد من الناس تستفيد والليكات علشان بتساعد في وصول الموضوع لعدد اكبر والكومنتات علشان نتناقش سوا وياريت تشاركنا بأسماء افلام انت شايف انها كانت عبقرية وتقول لنا انت بتجيب عناوين اعمالك منين وازاي؟؟
#موفينيل
#movinel
#عناوين_الأفلام_والمسلسلات
#Movies_and_series_titles
#title_3
#العنوان_3
تعليقات
إرسال تعليق