ازاي تعمل عنوان لفيلمك او مسلسل او رواية من تأليفك؟
Movies and series titles
مساء الخير عليكوا واهلا ومرحبا بيكوا ولقاء بيتجدد ديما عن كتابة الأفلامالنهاردة هانتكلم عن حاجة من الحاجات المهمة جدا ... اللي تقريبا مسكوت عنها تماما ومحدش بيقرب منها او يتكلم فيها ... والسهلة بالنسبة لناس كتير وصعبة جدا لناس اكتر وكما هي العادة هانمسكها ونفككها ونحاول نلاقي لها قواعد سهلة الأتباع بحيث اننا نعرف نتقنها ونطلع منها بنتايج احترافية
هانتكلم عن ازاي تجيب عنوان فيلمك او المسلسل بتاعك او رواية من تأليفك
ازاي تقدر تجيب عنوان مميز و يشد ومشوق لفيلمك بحيث يبقي مدي فكرة عن موضوعك وفي نفس الوقت مش بيحرق الفكرة او يكشفها زيادة عن اللازم زي مثلا ( بنات سوبرمان ) اسم لطيف بيكشف لك جزء من المحتوي بس مش بيكشف المحتوي كله وبيحفزك انك تكمل قرائة وكأن العنوان بيقولك بالظبط .. تخيل معايا ان سوبر مان خلف بنات واكيد البنات دول هايبقي عندهم قدرات خارقة .. تخيل معايا لما ده يكون الفكرة العامة ايه اللي ممكن يحصل جوا من احداث
طبعا معظمنها لما بيقدم نص بيبقي عامل له اسم ... وجرت العادة ان الأسم ده بيبقي مؤقت وغرضه الأساسي هو ارشفة العمل في دماغك ويكأنك بتعمل للعمل ده فايل في دماغك وبدل ما نسميه نيو فايل او نيو ديكيومنت بتخليه له اسم بس انت لو قدرت تبقي عارف وفاهم التكنيكس اللي هانتكلم فيها لاحقا هاتقدر تحط كام اقتراح لأسم العمل بتاعك مش هايخرج منهم الأسم اللي هاينزل بيه العمل ده لو ربنا كرمك وعرفت تسوقه (ابقي قابلني)
خلينا متفقين ان اول حاجة بتلفت انتباه اي حد هايقرأ الورق بتاعك بمجرد ما يسحب الورق من عالمكتب ويحطه علي حجره علشان يبدأ يقراه هو عنوان النص وبناء عليه فهو حاجة مهمة جدا علشان اللي بيقرأ ياخدك بجدية ويبقي عنده توقع ما لمدي احترافيتك وتمكنك
بيتعرض عليا اعمال اقراها وللوهلة الأولي ببقي عندي توقع ان العمل ده احترافي او عمل من اعمال الهواة بمجرد نظرة وحيدة للعنوان وغالبا في نسبة تكاد تتجاوز التسعين في المية بيبقي توقعي صحيح
وعلشان نفهم المفروض نعمل ايه خلينا الأول نعرف احنا المفروض مانعملش ايه ونضرب بعض الأمثلة بعناوين افلام او مسلسلات غير جيدة علشان نحط شوية قواعد
لو هاتستخدم عنوان قريب قوي لعنوان فيلم مشهور بدون سبب يستدعي زي مثلا لما تكتب فيلم بعنوان ( الباشا طالب ) مثلا او عنوان فيلم زي kill phil مثلا
لو هاتستخدم عنوان معقد جدا زي مثلا (عندما يقع الانسان ..... ) طبعا هو كان المقصود بالأسم ده يبقي افيه بس الش منهم واعتقد كمان انه اتعمل بالأسم ده سعيا وراء حتة ان فيلمنا اطول اسم في تاريخ الأفلام بس لما تشوف علي نتفليكس مثلا هاتلاقي اسم الفيلم ده تحديدا بقي فارص
انك تسمي فيلم اسم بسيط قوي يبدو وكأنه تلخيص ساذج لغرضك وفكرتك عن الفيلم زي مثلا الأمل ... الصراع .. الغرام ..
عناوين بالشكلة ده بتدي ايحاء للي بيقرأ انك من متأكد انت بتعمل ايه من قبل حتي ما يقول بسم الله الرحمن الرحيم ويقرأ اول سطر من السيناريو بتاعك
الكاتب العظيم هو اللي بيبقي قادر انه يعمل عنوان عظيم للعمل بتاعه .. مش عنوان ماشي حاله ... او عنوان هاه كويس ... لأ لازم يكون عظيم
- بناء علي ما سبق نقدر نقول بمنتهي الاريحية ان عنوان عملك الدرامي من المفترض انه يكون مابين كلمة واحدة ومايزيدش قدر الامكان عن اربع كلمات والنموذج الأكثر شيوعا هو كلمتين زي (بئر الحرمان) ... او ثلاثة زي (البحث عن فضيحة)
- حاول ديما تعتمد اشهر صيغ العناوين وهي المضاف والمضاف اليه او الصفة والموصوف .. زي مثلا ..بئر الحرمان ... دليل اثبات ... شقة العجوزة ... البيه البواب .. رغبة متوحشة ..
- لو قدرت تخلي في اسم عملك افيه لفظي او عبارة دارجة هاتحور فيها شوية ... بس يكون مناسب لفكرة الفيلم وخصوصا لو كوميدي يبقي شيء لطيف جدا زي .. كده رضا .. رغدة متوحشة ... استدعاء ولي عمرو ..... آرت اتاك
- العب احيانا علي لعبة التناقضات احيانا كتير بتاكل جدا في العنوان زي مثلا ... دهب عيرة ...
بعد ما شوفنا امثلة لأعمال اتنفذت فعلا خلينا نبدأ ناخد الأمور واحدة واحدة
هانقسم موضوع انك تجيب اسم لعملك تقريبا لست مناطق محددة
هات اسم لعملك تقدر تعصر وتلخص فيه جوهر فيلمك
هات اسم لعملك مرتبط بشخصية البطل في العمل
هات اسم لعملك مرتبط بالموقع اللي بتحصل فيه الأحداث
هات اسم لعملك مرتبط بموقف او احساس
ازاي تكتشف اذا كان اسم العمل بتتاعك حلو ولا بلح
اخيرا هانعمل شوية تدريبات علي صفحة عنوان النص في السيناريو بتاعك
- اسم لعملك تقدر تعصر وتلخص فيه جوهر فيلمك
واحدة من اسهل وابسط الطرق لتسمية عملك هو انك تجيب حاجة تلخص قصة فيلمك في عدد قليل من الكلمات .. هو بيتكلم عن ايه فعليا .. ايه الصراع الأساسي في القصة ... ايه المشاعر اللي محتاج تصدرها للجمهور من خلال اسم العمل بتاعك
امثلة
بئر الحرمان .. الجيد السئ والقبيح .. المواطن كين .. الباشا تلميذ ... ادب شعبي (بالب فيكشن) .. الفك المفترس .. النافذة الخلفية .. هروب اضطراري .. عيار ناري ... الخلاص من شوشانك
في كل الأمثلة السابقة هاتلاقي ان نوعية الفيلم وفكرته تقريبيا بتفوح بوضوح من الأسم اللي بيتكلم بوضوح عن فكرة الفيلم وهو بيدور حوالين ايه وايه اللي بيخلي الفيلم ده متميز عن غيره
وعلشان تبدأ تشتغل علي اسم عملك القادم هاتحتاج نبص لأسمه من تلاتة زوايا
شخصية
مكان
موقف او احساس
اكيد طبعا في اعمال كتير لا تندرج تحت التقسيمة دي بس دول هانتكلم فيهم قدام شوية .... بس خلينا ملتزمين بواحد من التلات نماذج اللي فوق علشان تكون بالنسبة لنا نقطة بداية كويسة
خلينا نمسك بند بند وندرسه ونوضحه بشوية امثلة تقرب وجهات النظر بس ده مش هايكون المرة دي هايكون في البوست الجاي
وبكده يكون كلامنا انتهي عن الجزء الأول من موضوع عنوان عملك يارب اكون قدرت افيدكوا ومش محتاج افكركوا زي كل مرة بالشير علشان اكبر عدد من الناس تستفيد والليكات علشان بتساعد في وصول الموضوع لعدد اكبر والكومنتات علشان نتناقش سوا وياريت تشاركنا بأسماء افلام انت شايف انها كانت عبقرية وتقول لنا انت بتجيب عناوين اعمالك منين وازاي؟؟
لو حابب تكمل قراية ادخل علي اللينك ده من هنا
#موفينيل
#movinel
#عناوين_الأفلام_والمسلسلات
#Movies_and_series_titles
#title
#العنوان
تعليقات
إرسال تعليق