واليكم ال36 حبكة وأشهر أمثلة عليهم :
1) حبكة الرجاء والتوسل – قايمة على ان في شخص واقع في مشكلة وشخص تاني يقدر ينقذه أو حتى يعفو عنه ويسامحه، وهي قصة معروفة ودارجة جدًا في أفلام الكبار والصغيرين ومن أمثلته فيلم The Wizard of Oz
2) الخلاص – شبه الحبكة اللي قبلها في وجود الشخص اللي واقع في مشكلة ما ولكن بتختلف في ان الطرف اللي قدامه بيقوم ينقذه من نفسه من غير توسل ورجاء، مثلًا زيّ فيلم Speed بتاع ساندرا بولوك.
3) جريمة بعدها انتقام – مافيش حد مش هيفتكر فيلم محبوك الحبكة دي، اللي بتبقى فكرتها ان حد بيعمل جريمة ما والشخص التاني بينقم منه بسببها، وهي حبكة كويسة جدًا ومستخدمة كتير في أفلام الأكشن والساسبنس، والجمهور بيبقى متعاطف مع المنتقم، زيّ فيلم أمير الإنتقام لأنور وجدي وفيلم Kill Bill
4) الانتقام بين القرايب – تيمة معروفة في الأفلام بما ان القرايب دايمًا مادة دسمة وعلاقاتهم متشابكة ولامسة الكل، من أهم وأحلى الأفلام اللي استخدمت الحبكة دي فيلم The Lion King
5) الملاحقة – فكرتها انه البطل هربان من العدالة، سواء على شيء عمله، أو على شيء ماعملوش، وفي الحالتين بيتعاطف المشاهدين مع البطل. من أشهر أفلام الحبكة دي فيلم الهروب لأحمد ذكي.
6) الكارثة – بتدور حوالين حدث كارثي بيحصل ومعاه أحداث صغيرة للشخصيات، زيّ فيلم 2012 اللي كان بيتكلم عن نهاية العالم، أو فيلم Titanic اللي الحدث الأساسي فيه هو غرق المركب.
7)وقوع البطل فريسة لسوء الحظ – تيمة لما بتستخدم المخرج بيبقى حريص قبلها انه يورينا ان كل شيْ ماشي تمام لحد ما يحصل الحدث اللي مرتبط بسوء الحظ ويغير مجرى الأحداث اللي في حياة البطل، زيّ فيلم Cast Away.
8)الثورة – البطل في الأفلام دي بيتعرض لحدث بيقهره فا بيقرر يثور على الشر، زيّ فيلم هي فوضى مثلًا.
9) المشاريع الشجاعة – يعني فيلم بيدور حوالين تنفيذ مشروع أضخم من قدرة اللي بينفذوه، وبيبقى مشروع هدفه نبيل، خير مثال فيلم حياة حشرة أو Bug’s Life اللي فيه نمله بتحاول تعمل خطة ومشروع تنقذ باقي عشيرتها من الجراد
10) الإختطاف – بيتمحور حوالين الخاطف والمخطوف، في أمثلة كتير منه زيّ فيلم ملاك وشيطان لرشدي أباظة وفيلم جعلتني مجرمًا لأحمد حلمي
11) اللغز – من الحبكات المفضلة عند الجمهور علشان المخرج فيها بيركز على ان البطل يعرف التفاصيل مع الجمهور مش قبلهم، وبنفضل سوا في اللغز لحد ما يحله البطل والمشاهدين في نفس اللحظة، وده مثلًا زيّ فيلم ملاكي اسكندرية.
12) المكسب – صفقة أو مفاوضات علشان طرف معين يكسب، زيّ فيلم Amistad اللي البطل فيه محامي بيترافع ويفاوض بلدين علشان يدي مجموعة من العبيد حريتهم
13) عداوة ما بين القرايب – هي أقرب حاجة لعداوة القديمة بين قابيل وهابيل وسيدنا يوسف وأخواته، من أمثلتها فيلم Kramer vs. Kramer
14) تنافس بين القرايب – ودي مافيهاش عداوة، هي مجرد منافسة بين اتنين قرايب أو اصدقاء على حاجة معينة مع علاقة كويسة، زيّ فيلم صاحب صاحبه لمحمد هنيدي وأشرف عبد الباقي
15) جرايم بسبب خيانة زوجية – قتل علشان خيانة، متكونة من الزوجين والعشيق والجريمة، زيّ أفلام كتير منها عفوًا أيها القانون
16) الجنون – أحداثها معتمدة على جنون حد من الأبطال، زيّ فيلم The Shining لستانلي كوبريك
17) الحماقة القاتلة – بتبدأ بتصرف عبيط وطايش وتؤدي لكارثة، زي فيلم المكالمة القاتلة لفريد شوقي، بيبدأ ببنت مراهقة بتعاكس الناس في التليفون وتقول لواحد انا معايا دليل على قتل مراتك، فالصدفه انه الراجل قتل مراته فعلًا ومن هنا بتبدأ الكارثة.
18) غلطات مش مقصودة بسبب الحب – ودي كانت موضة في السبعينات في الهند وأفلامها، فكرتها ان اتنين يحبوا بعض ويكتشفوا انهم اخوات مثلًا، ولا ان حد مرتبط منهم، أو حتى عنده مرض مميت.
19) قتل القرايب من غير قصد – كمان دي حبكة دارجة جدًا، حد من الأبطال بيقتل حد ويكتشف انه شخص مهم بالنسبة له، زيّ فيلم الباطنية لنادية الجندي اللي بعد ما انتقمت أكتشفت ان الضحية ابنها.
20) التضحية علشان المبدأ – بطل بيضحي بنفسه علشان مبدأه اللي متمسك بيه، تيمة معروفة وممكن التضحية تبقى بشغل أو سمعة أو نفس، فيلم
21)التضحية للغير – نفس مبدأ التضحية ولكن علشان الغير، زي فيلم “ألف مبروك” لأحمد حلمي
22) التضحية علشان الشغف – ودي تضحية مرتبطة بالإدمان اللي المدمن بيضحي علشانه بأي حاجة، زيّ شخصية آسر ياسين في فيلم زيّ النهاردة.
23) التضحية بالغير – الإحتياج اللي بيجبر حد انه يضحي بغيره، من أوضح امثلته فيلم “لا تسألني من انا” لشادية، فهي بتضحي ببنتها علشان تأكل بقية ولادها، أو فيلم الجراج
24) المنافسة – الفيلم عبارة عن مسابقة بين اتنين، حد منهم لازم يكسب، ساعات بيستخدم في أفلام ليها علاقة بالرياضة، زي فيلم Rocky
25) الخيانة – وبتختلف هنا انها مافيهاش قتل، وكمان ممكن تتعاطف مع العشيقين، زيّ فيلم نهر الحب لعمر الشريف وفاتن حمامة
26) غلطات بسبب الحب – تركيزها على الغلطات اللي بنعملها بسبب حبنا لشخص ما، سواء علاقات خارج الإطار الصحيح أو حتى جرايم
27) عقبات قدام الحب – ودي الأشهر على الإطلاق، زى البنت الفقيرة اللي بتحب الولد الغنى، فيلم اضحك الصورة تطلع حلوة مثلًا.
28) الوقوع في حب العدو – من غير ما تتشرح، عمرنا ما هننسى آمنة اللي حبت الباشمهندس اللي اتسبب في موت أختها هنادي في فيلم دعاء الكروان
29) طموح – طموح لوصول لهدف معين، نهايته سعيده أو لأ لكن فكرة الفيلم هي الرحل، من أحلى الأمثلة فيلم Pursuit of Happiness
30) اكتشاف حقيقة مشينة عن قريب – مكونة من بطل بيكتسف ماضي أو حاضر مش جميل لبطل تاني، زيّ فيلم Deceived
31) صراع مع قوة مش شايفينها – صراع بين الشخص ومبادئه أو نفسه أو الحظ والقدر، منها فيلم The Truman show
32) غيرة مش في محلها – زيّ زوجين بيشكوا في بعض وهم ماغلطوش أو غيرة الأصدقاء او القرايب، منهم فيلم Monster in Law وفيلم كرامة زوجتي
33) احكام غلط – واحداثها بتحصل علشان في حد من ابطالها حكم على غيره حكم غلط، بالخيانة مثلًا زىّ فيلم المرأة المجهولة
34) الندم – عن ذنب بيحصل والبطل بيحاول يكفر عنه ويتوب، من أحلى أمثلته فيلم Atonement
35) استعادة المفقود – فيها من حبكة الخطف، ولكن كمان بتدور حوالين ان طرف تايه والتاني بيدور عليه ومن ألذ امثلتها اللي مابتتنسيش فيلم Baby’s Day Out
36) خسارة الحبيب – قصة الحب اللي بتنتهى بموت حبيب أو قريب، منها فيلم Sweet November و فيلم انت عمري
تعليقات
إرسال تعليق