المكافح العنيد لظاهرة التفخيد ج 2

 الحلقة التانية من الكتاب المترجم Butt in chair ^_^

و ترجمته العامية "المكافح العنيد لظاهرة التفخيد :v " 

تأليف : اسلام عماد لينك البروفايل بتاعه من هنا 

عن علاج لظاهرة الكسل اللى بتمنع المؤلفين من بدء كتابتهم لأعمالهم الادبية..

الحلقة الثانية : ]حقائق عن الكتابة[

قيود كتابتك انتا اللى حاططها بنفسك..لنفسك

"احنا اللى بنفرض علي نفسنا قيود تمنعنا من الحرية.."

هل اتمنيت قبل كده انك تدخل مسابقة في الكتابة؟ او انك تتعلم ازاي تكتب سيناريو؟ او رواية؟

طب ايه اللى مانعك؟

هل انتا حاسس انك مش هتقدر تعمل دا؟ هل انتا "متأكد" انك مش هتقدر تعمل دا ؟ هل جاسس انك محتاج تعرف اكتر عن اللى هتكتبه؟ او انك لازم تبقي خبير في الكتابة عشان تبدأ تكتب؟

مهما كان اللى مانعك...لازم تعرف انك السبب الاكبر في المنع دا.

لو اقنعت نفسك دايماً انه صعب تكتب رواية, يبقي فعلاً عقلك هيكون صعب عليه انه يساعدك تكتب رواية.

لكن لما تعرف ان قيودك دي داخلية, ساعتها هتتغلب علي الموانع, و هتبدأ تكتب.

تخيل لو صاحبك جه و قاللك انه هيكتب رواية..هل هتشجعه؟ و هل هتحفزه لو بدأ يكسل او ييأس ؟

ولا هتحط عليه قيود اكبر و انه لازم يعمل كذا و كذا وكذا عشان يبقي يعرف يبدأ يكتب بعدين؟  وانك هتقنعه بأن حلمه دا مستحيل؟

اكيد مش هتعمل دا..اكيد هتشجعه و تساعده, وهتبقي اكبر معجبينه.

يبقي ليه مش عاوز تعمل دا لنفسك؟

انتا الوحيد اللى باقي لك طول العمر, يبقي لازم تحب نفسك, و تخاف عليها. لازم تبقي اعز اصدقاء نفسك.

ومينفعش تحط قيود لأعز اصدقائك, ولا تتكلم عنه بطريقة وحشة, ولا تحسسه ان احلامه دي ملهاش لازمة.

بطل تعمل كده ف نفسك!

انتا كاتب ذكي وموهوب, و القيود اللى مانعاك دي كلها وهم ف دماغك.

فك القيود, و استعد للعظمة اللى جاية لك ف السكة.

ف الحلقة الجاية هنشوف ايه الخطوات الفعلية لتنفيذ الكلام دا كله..

----------------

انتظروا كل يوم حلقة من الكتاب اللطيف دا, و اتمني يكون مفيد ليكم و ليا, و يساعدنا كلنا علي تخطي الكسل و البدء في كتابة افكارنا و احلامنا ^_^

و بإذن الله بقية الحلقات هتنزل ف نفس الهاشتاج دا لسهولة متابعتها للي حابب..

#butt_in_chair