المكافح العنيد لظاهرة التفخيد ج3

 الحلقة التالتة من الكتاب المترجم Butt in chair ^_^

و ترجمته العامية "المكافح العنيد لظاهرة التفخيد :v "

ترجمة إسلام عماد تواصل معه من

عن علاج لظاهرة الكسل اللى بتمنع المؤلفين من بدء كتابتهم لأعمالهم الادبية..

..

الحلقة الثالثة :

كفاية نظري, ابدأ في العملي..

1- صاحب نفسك:

لما تبقي صاحب نفسك, هتعرف ان الطريقة اللى عاملت بيها نفسك كل السنين اللى فاتت كانت غلط (بأنك تحدد قدراتك ف اطار ضيق, او انك تقلل من امكانياتك, او تبطل تحلم). مادام مش هتعامل اعز صحابك او افراد عيلتك بالشكل دا, يبقي بتعامل نفسك كده ليه؟

2- اعرف ايه سبب القيود اللي فرضتها:

هل عشان انتا بتخاف؟ ولا عشان فاكر ان الناس هترفض حاجاتك؟ 

انك تعرف سبب القيود, دا اول خطوة عشان تشيلها فعلاً.

3- غير من طريقة كلامك لنفسك:

دي خطوة مهمة جداً..لو عاوز تشيل القيود اللى حطتها لنفسك, لازم تغير طريقة كلامك و تفكيرك مع نفسك. من الطرق اللطيفة لكده, انك تكتبها..اكتب قدامك "انا مؤلف شاطر", أو "انا بكتب حلو", و اقنع نفسك الداخلية بكده, عشان تبدأ تمشي علي طريق قبول ذاتك و تشجيع نفسك بنفسك.

يمكن ف الاول هيكون صعب انك تصدق كده, لكن كل ما تشتغل بناءً علي كده, هتبدأ تصدق و تؤمن بيه كحقيقة واقعية...انتا بس جرب الاول.

4- اقبل نفسك و عيوبك زي ماهي  :

انتا مش هتبقي ستيفن كينج ولا نجيب محفوظ ولا د.احمد خالد توفيق...طب و إيه المشكلة ؟

انتا هتبقي انتا..و دا احسن شئ ممكن يحصل لك. انتا مميز لأنك ليه نظرة مختلفة عن الباقيين.

طبعاً, قبول نفسك هياخد منك وقت, ومش هيحصل ف يوم وليلة. لكن بمجرد ما تبطل تقول لنفسك انك متقدرش, و تقنع نفسك بأنك تقدر علي اي شئ, دا هيشيل عنك القيود اللى مانعاك عن الحاجة اللى بتحبها...الكتابة.

اقعد, امسك ورقة...و اكتب ياللا.

5- اعمل قايمة بالحاجات اللى بتحبها فيك  :

لما تركز علي مميزاتك و نقاط قوتك, هتكتشف حاجات تانية بتحبها ف نفسك, ولما تحب نفسك (بالطريقة الصح المفيدة ليك, من غير غرور او نرجسية), هتبدأ تهتم بنفسك, و تهتم بأنك تدوس ف الحاجات اللى عاوزها لنفسك أولاً.

6- فكر ف قايمة بأسباب تقييدك لنفسك  :

لما تعرف سبب تأخيرك لنفسك عن احلامك ف الكتابة, هتقدر تاخد خطوة لقدام, و تبدأ تشيل القيود دي.

7- ابدأ بكتابة كل دا:

لما تكتب افكارك ع الورق, هتلاقي ان الكتابة دي ف حد ذاتها ساعدتك انك توطي صوت عقلك الباطن اللى بيوسوس لك بالكسل و الفشل دايماً.

انتا كويس, و هتقدر تبقي احسن و احسن, و تقدر تعمل دا. 

خليك ايجابي, و دور ع الجانب الايجابي لأي شئ يحصل دايماً.

و ف الحلقة الجاية هنعرف ايه اللى بتخسره كل ما تكسل تكتب..وهل انتا فعلاً ماشي بمبدأ "إما كل شئ أو مفيش" ؟

----------------

انتظروا كل يوم حلقة من الكتاب اللطيف دا, و اتمني يكون مفيد ليكم و ليا, و يساعدنا كلنا علي تخطي الكسل و البدء في كتابة افكارنا و احلامنا ^_^

و بإذن الله بقية الحلقات هتنزل ف نفس الهاشتاج دا لسهولة متابعتها للي حابب..

#butt_in_chair