المكافح العنيد لظاهرة التفخيد ج4

 الحلقة الرابعة من الكتاب المترجم Butt in chair ^_^

و ترجمته العامية "المكافح العنيد لظاهرة التفخيد :v "

عن علاج لظاهرة الكسل اللى بتمنع المؤلفين من بدء كتابتهم لأعمالهم الادبية..

ترجمة إسلام عماد للتواصل معه عبر الفيس بوك اضغط هنا 

الحلقة الرابعة :

اعرف خسايرك..

هل فكرت فعلاً قبل كده انتا ليه بتكسل تبدأ تكتب ؟

لأنك بدل الكتابة, تقدر تنجز حاجات تانية كتيرة جداً...ممكن تخلص توضيب اوضتك, او تنزل مشوار مع صحابك, او تتفرج علي سلسلة افلام كاملة....عشان كده طبيعي انك تكسل تبدأ تكتب...بتبقي اتحركت من مكانك شوية, و خرجت مع صحابك, و قضيت وقت لطيف, بدل ما تضطر تواجه حاجات تانية, زي مخاوفك الداخلية, شكوكك, و افكارك اللى ف اعمق اعماق دماغك. 

لكن بعد الخروجة و الوقت اللطيف, هتلاقي ان الحاجات التانية مازالت موجودة مخرجتش ف حتة.

الكتابة حاجة مخيفة فعلاً في البداية..انك تجمع افكارك و الكلمات اللي عاملة زحمة ف دماغك, و تنقلهم قدامك علي ورقة, وتلاقيهم بقوا حاجة واقعية ملموسة انتا اللى عملتها, وبعدها هتتعرض ع الناس عشان يقرأوها...شئ مخيف فعلاً !

لكن تعالا نبص لها من منظور تاني, وساعتها هتعرف ان الكسل بيضيع عليك كتييير.

انتا بتضيع علي نفسك فرصة انك تطلع اللى جواك, انك تحكي للناس حكاياتك, ان شخصياتك هتفضل طول الوقت محبوسة مش قادرة تقول ولا كلمة للناس....انتا بتدفن فكرة جبارة, و بتسكت الصوت اللى جواك اللى بيقول "انا عاوز ابقي كاتب"....انتا بتتخلي عن حاجة قبل ما تديها فرصة تحصل اساساً.

و مع ضياع كل دا, طبيعي انه يضيع معاهم احلامك الخاصة بالكتابة.

الكسل حلو, و مريح, لكنك بسببه هتكتشف انك ماشي في حلقة مقفولة مش بتخلص, و مش هتوديك ف حتة.

اقعد, امسك ورقة...و اكتب ياللا.

اكتب قايمة بالحاجات اللى بتخسرها بسبب كسلك.

و احياناً مش لازم تكسل تبدأ كتابة, لكن بيجيلك الكسل عن طريق سكة تانية..انك مش لاقي الوقت الطويل بشكل كافي للكتابة...

و دا اللى اسمه مبدأ "إما كل شئ أو مفيش" !

المبدأ دا بيحصل لعدد كبير من المؤلفين و الكتاب..و دا شئ اكيد بيحصل للكل, كلنا بقينا مشغولين و الحياة صعبة, و فيها مسئوليات و أولويات اهم غصب عننا كلنا.

بس للاسف, المبدأ دا يعتبر نوع من انواع القيود اللى بنقيد بيها نفسنا بنفسنا..

لأن ف الحقيقة هتقدر تخلص كتابة روايتك سواء بتكتب 10 دقايق ف اليوم, او 10 ساعات ف اليوم..اهم حاجة هو التصميم و النية, و انك تنسي مبدأ "إما كل شئ او مفيش" اللى بيبعدك عن الكتابة و تحقيق اهدافك.

فيه اكتر من طريقة عشان تقدر تطلع بوقت للكتابة, حتي ولو كانت 10 دقايق بس ف اليوم...انتا بس انسي شوية جزءية "الكتابة محتاجة قعدة طويلة", لأنه صعب انه يحصل كتير.

طب إزاي اتخلص من مشكلة "إما كل شئ او مفيش" ؟

1- استغل اي وقت ممكن: 

بدلاً من انك تستني الوقت المناسب بشكل كافي للكتابة, استغل اي وقت ييجي قدامك..لو عندك 10 دقايق قبل الغدا, اكتب فيهم. لو عندك دقيقتين وانتا مستني توصل للكاشير, اكتب ملاحظاتك بخصوص الرواية ع الموبايل , لو اولادك ناموا بدري شوية, اكتبي.

2- قسم الكتابة لأجزاء خفيفة:

بدل ما تقرر تكتب 10 صفحات من الرواية ف كل مرة, اكتفي بصفحة او اتنين مثلاً يومياً..اظن دا اسهل شوية, مش كده ؟

3- وفر وقت للكتابة جوا روتينك اليومي:

لمدة اسبوع, حاول انك تظبط ولو 10 دقايق يومياً عشان الكتابة. و الاسبوع اللى بعده خليهم ربع ساعة, وكل اسبوع زود عليهم ولو خمس دقايق, لغاية ما توصل لنص ساعة او ساعة يومياً تقدر تكتب فيهم.

وخليك فاكر, اي كتابة تعملها ف اي وقت تلاقيه, احسن بكتييير من عدم الكتابة خالص.

"إما كل شئ أو مفيش", و بقية اخواته من القيود اللى بنفرضها علي نفسنا, يعتبروا كلهم افراد في العيلة الكبيرة..عيلة " الأعذار"..

و هتلاقي ناس كتيرة بتتناقش ان الانشغالات اليومية دي مش اعذار, دا شئ واقع مفروض علينا, او ان جالهم الwriter’s block او "قفلة الكتابة" او "حبسة الكتابة" دي مرض مش اعذار, ولكن خليني اقولهالك بشكل صريح....دي كلها اعذار!

 و ف الحلقة الجاية هنعرف ايه هي الحاجات اللى بنقنع نفسنا بيها عشان نكسل نكتب, و ازاي هنكتشف ف الاخر انها مجرد اعذار..

----------------

انتظروا كل يوم حلقة من الكتاب اللطيف دا, و اتمني يكون مفيد ليكم و ليا, و يساعدنا كلنا علي تخطي الكسل و البدء في كتابة افكارنا و احلامنا ^_^

و بإذن الله بقية الحلقات هتنزل ف نفس الهاشتاج دا لسهولة متابعتها للي حابب..

#butt_in_chair