المكافح العنيد لظاهرة التفخيد ج5

 الحلقة الخامسة من الكتاب المترجم Butt in chair ^_^

و ترجمته العامية "المكافح العنيد لظاهرة التفخيد :v " 

ترجمة إسلام عماد للتواصل معاه اضغط هنا 

عن علاج لظاهرة الكسل اللى بتمنع المؤلفين من بدء كتابتهم لأعمالهم الادبية..

الحلقة الخامسة :

كل التبريرات أعذار...

مادام انتا كاتب كسول, اكيد استخدمت الاف الاعذار عشان تبرر لنفسك سبب التأخر عن الكتابة.

يمكن تكون بالنسبة لك اسباب مقنعة, لكن ف النهاية, دي مجرد اعذار بس مستخبية شوية.

مش مصدقني؟ طب تعالا نشوف اشهر الاسباب دي, و ليه هي اعذار مستخبية:

العذر الأول: انا مرهق جداً...مش هقدر اكتب.

ليه دا عذر مستخبي: دي طريقة من طرق الهروب من الكتابة. كلنا بنقدر نقسم وقتنا علي الحاجات اللى بتتعمل, و اللى بيتبقي ف نهاية اليوم, بنخليه لليوم التاني. فلو انتا مرهق جداً و مش هتقدر تكتب, يبقي انتا من البداية مش حاطط الكتابة كأولوية ضمن اولوياتك.

العذر التاني: المود قافل/ عندي قفلة كتابة.

ليه دا عذر مستخبي: المود القافل مش بيمنعك من الكتابة, لكن اللي بيمنعك فعلاً هو عدم اختيارك للخروج من المود القافل دا.

لو انتا مش مرتاح و واثق لما تيجي تكتب, هتلاقي الافكار معصلجة معاك. و فيه سبب تاني لكده, انك مصعبها علي نفسك اوي, و حاطط نفسك تحت ضغط كبير. لما تتزنق فعلاً, ساعتها قول ان مودك قافل, و قوم ارتاح شوية, و روق دماغك.

العذر التالت: معنديش اي افكار للكتابة.

ليه دا عذر مستخبي: لما بتقول كده, بيبقي عقلك مليان طاقة سلبية. فيه ملايين الافكار اللى ممكن تكتب عنها, لكن انتا دلوقتي حبست نفسك ف سجن الكسل و الخوف. متخافش, شغل دماغك و فكر زي مانتا عاوز, وشارك افكارك مع الناس كلها.

العذر الرابع: هبقي اكتب بعدين مش دلوقتي.

ليه دا عذر مستخبي: انا و انتا عارفين كويس انك مش هتكتب بعدين ;)

هتفضل تقول لنفسك انك هتكتب بعدين, لكن مش هتعمل دا إلا لو اتزنقت ف معاد تسليم الكتابة. دا العذر الاول عند كل الكسالي.

يمكن عدم تأجيل الكتابة لوقت بعيد يكون حل مؤقت,لكن مع الوقت, هتلاقي نفسك بطلت تعمل الحركة دي.

العذر الخامس: انا مشغول جداً و مش هلحق اكتب.

ليه دا عذر مستخبي: انتا فعلاً عندك وقت كبير جداً عشان تعمل فيه حاجات تانية اقل اهمية, زي الفرجة ع التليفزيون, الفيسبوك..إلخ. 

لازم تعرف ان اللي هيخليك تخلص كتابة روايتك المتأخرة, هو انك تخليها اولوية عندك قبل حاجات تانية.

العذر السادس: اول ما هبدأ كتابة, هخلص الرواية كلها ف كام يوم.

ليه دا عذر مستخبي: اكيد الكتابة مش هتاخد معاك وقت طويل, لكنك عمرك ما هتبدأ كتابة و انتا بتفكر بالطريقة دي. لو انتا مصدق فعلاً انك هتخلصها في كام يوم, طب ياللا ابدأ دلوقتي و خلصها :D

العذر السابع: مش عارف ابدأ اكتب منين او اكتب ايه.

ليه دا عذر مستخبي: مش لازم دايماً تكون عارف هتكتب ايه او هتبدأ منين. ابدأ بس, و ابعد القلق عن نفسك, و هتلاقي الكلام بيجيب بعضه.

العذر التامن: محدش هينشر الكلام اللى بكتبه دا.

ليه دا عذر مستخبي: ايه اللى يضمن لك ان دا هيحصل ولا لأ؟ ابدأ بس, و ملكش دعوة بالنشر دلوقتي.

العذر التاسع: انا مش عارف اركز دلوقتي للكتابة.

ليه دا عذر مستخبي: عدم التركيز دا شئ اساسي و مستمر. لو عاوز تبقي كاتب, هتحتاج تتعلم ازاي تتخطي عدم التركيز و كل عوامل التشتيت اللى حواليك, و تبدأ تكتب مهما حصل.

العذر العاشر: فيه ناس كتيرة بتكتب احسن مني.

ليه دا عذر مستخبي: دي مجرد مشكلة قلة ثقة بالنفس. ثق بنفسك. انتا موهوب و تقدر تكتب حلو. و عادي ان فيه ناس احسن منك, طور من نفسك و هتبقي زيهم و احسن.

العذر الحداشر: الإلهام مش بييجي لي ف الوقت اللى ببقي فاضي فيه.

ليه دا عذر مستخبي: دا عذر شبه عذر قفلة الكتابة. و الحقيقة, انك كل ما تكتب اكتر, كل ما الإلهام هيبدأ يظبط وقته علي وقتك. صدقني, اقعد و ابدأ كتابة دلوقتي.

شفت بقي ان الاسباب طلعت ف الاخر مجرد اعذار مستخبية ؟

راقب نفسك و اعمل قايمة بأسبابك الشخصية اللى مانعاك عن الكتابة, و بعدين راجعها و اكتشف ازاي هي اعذار مستخبية.

اقعد علي مكتبك, وابدأ كتابة ياللا.

بكرة ف الحلقة الجاية هنكتشف سوا ان كل الاعذار دي مصدرها شئ واحد...الخوف!

----------------

انتظروا كل يوم حلقة من الكتاب اللطيف دا, و اتمني يكون مفيد ليكم و ليا, و يساعدنا كلنا علي تخطي الكسل و البدء في كتابة افكارنا و احلامنا ^_^

و بإذن الله بقية الحلقات هتنزل ف نفس الهاشتاج دا لسهولة متابعتها للي حابب..

#butt_in_chair