المكافح العنيد لظاهرة التفخيد ج6

 الحلقة السادسة من الكتاب المترجم Butt in chair ^_^

و ترجمته العامية "المكافح العنيد لظاهرة التفخيد :v "

عن علاج لظاهرة الكسل اللى بتمنع المؤلفين من بدء كتابتهم لأعمالهم الادبية..

ترجمة إسلام عماد للتواصل معه اضغط هنا

الحلقة السادسة :

مفيش مشكلة انك تخاف, بس قوم اكتب بعدها...

الخوف زي ما القاموس بيقول هو احساس ضاغط بالخطر أو الألم, سواء كان الخطر دا حقيقي او متخيل.

و لما نيجي نتكلم عن اسباب كسل الكتابة, يبقي الخوف دا متخيل.

و مادام الخوف دا مش حقيقي, يبقي ليه المؤلفين بيخافوا؟ 

لأنهم بيعتقدوا ان الخوف دا حقيقي, و بينقسم بالنسبة لهم لأربع انواع, هي: الخوف من النجاح, الخوف من الفشل, الخوف من الرفض, الخوف من عدم كونهم كويسين كفاية.

لكن الكسل مش بيبقي بسبب المخاوف دي بشكل مباشر, و بيستخبي ورا الأعذار المستخبية زي ماقولنا قبل كده....بس متقلقوش, المخاوف دي ليها حلول, هنعرفها حالاً ^_^

أولاً: الخوف من النجاح:

النجاح حاجة كبيرة بتخوف الكسالي...اكيد مش مصدق, صح ؟ ازاي حد هيخاف من حاجة كويسة زي النجاح؟

طيب..تعالا نشوف.

ناس كتيرة بتخاف من النجاح لأنه بيختبر حدودهم, و بيعرضهم لمواقف جديدة عليهم...دا كمان ممكن يكشف لهم نقاط ضعفهم, و يجبرهم علي اصلاح عيوبهم الداخلية.

مشكلة تانية بتظهرلنا...اي نجاح لازم هيحصل معاه تغيير...و التغيير مخيف لعدد كبير من الناس.

النجاح بيجيب معاه تحديات و مسئوليات, و دا شئ لازم يخوف الكسالي.

احياناً, فيه ناس بتخاف من النجاح عشان المديح اللى هيجيلهم من بعده.. فعلاً, فيه ناس مبتحبش الناس تمدح فيها, او بيخافوا يعرفوا أنهم عندهم حاجات مميزة..بس دا عشان هما من جواهم مقللين من قيمة نفسهم...الحقيقة دايماً صادمة.

هقولك شوية حاجات, هتقدر تعرف منهم انتا بتخاف من النجاح ولا لأ:

- عندك كسل...سواء كان بسبب انشغالك الدائم, او تعبك, او وراك حاجات بتخلصها ف البيت, او هتبقي تكتب شوية بعد ما تشوف حلقة مسلسلك المفضل.

- عندك انطباع سلبي عن كتابتك...دايماً شايف ان مفيش هدف من الكتابة دي, مادام محدش هينشرلك كتابتك, او ان الكتابة دي هتبقي مجرد تضييع وقت, و ان فيه ناس كتيرة حواليك بيكتبوا احسن منك.

- اقوال لا افعال...دايماً بتتكلم مع الناس عن افكارك للكتابة, وتخطيطاتك,و مسوداتك, و ازاي نفسك تبقي كاتب كبير....لكنك مكتبتش ولا حرف...انتا عملت كل حاجة ماعدا انك تكتب فعلاً.

..

النجاح ممكن ييجي معاه ضغوطات و تغييرات كبيرة فعلاً, لكنه هيحقق لك احلامك بالنهاية, عشان كده ثق ف قدراتك و ف جودة كتابتك مهما كانت...احياناً بيبقي الخوف من النجاح بسبب قلة الثقة ف النفس.

ثانياً : الخوف من الفشل :

بعد ما عرفنا الخوف من النجاح عامل ازاي, تعالوا نشوف اخوه التوأم..الخوف من الفشل.

الخوف من الفشل هو اخطر انواع المخاوف الاربعة عند الكسالي, لأنه بيبعدهم عن البدء بسبب خوفهم من الفشل, لدرجة انهم بيقللوا من قيمة نفسهم الداخلية, عشان ميضطروش للبدء ف اي حاجة كبيرة.

و العجيب انك بمجرد ما تقرر تكسل , ساعتها هتوصل للحاجة اللى بتخاف منها فعلاً...هتفشل بجد !

الخوف دا غالباً بيرتبط بعقد في الطفولة, سواء بسبب مواقف حسيت فيها بالفشل قدام الأهل, او بالإحراج قدام ناس غريبة عنك بسبب فشلك دا....علماء النفس بيقولوا ان الخوف دا ممكن يستمر من الطفولة لغاية بقية حياتنا, بل هيفضل يزيد مع مرور الوقت...إلا لو قررنا نعمل حاجة و نبعده عننا.

دي شوية علامات, هتعرف منها ان عندك الخوف من الفشل:

- بتتجنب انك تعمل حاجة لو عرفت انها هتاخد وقت و مش هتخلص فوراً.

- مبتحطش اهداف لنفسك, لأنك فاكر طول ما مفيش اهداف لازم تتعمل, يبقي مفيش فشل هيحصل.

- بتكسل في حاجات نفسك فيها, لأنك مش واثق انك تقدر تعملها.

- بترضي بحاجة اقل من المطلوب ( وانتا عارف دا كويس).

- بترفض تطلع برة الcomfort zone بتاعتك.

- بتعيش حياة متوسطة..ممكن تبقي احسن, بس ليه تصلح ف حاجة لسه متكسرتش ؟

- بتعمل الحاجات اللى انتا عارف انك كويس فيها و بس.

- بتخلي كسلك يحطلك حدود علي حياتك.

- قبل ما تعمل حاجة جديدة, بتتخيلها ف عقلك, لو لقيتها احتمال تفشل, او الناس هتنتقدك بسببها, بتبعد عنها فوراً.

- بتتنازل عن الحاجات بسهولة جداً.

- بتخاف ان الناس تحكم عليك او تنتقدك علي انك متقدرش تعمل الحاجة بشكل ممتاز.

..

طب ايه الحل؟

هقولك ف الحلقة الجاية ;)

----------------

انتظروا كل يوم حلقة من الكتاب اللطيف دا, و اتمني يكون مفيد ليكم و ليا, و يساعدنا كلنا علي تخطي الكسل و البدء في كتابة افكارنا و احلامنا ^_^

و بإذن الله بقية الحلقات هتنزل ف نفس الهاشتاج دا لسهولة متابعتها للي حابب..

#butt_in_chair