الدليل الكامل لكتابة مكالمات التليفون في السيناريو الدرامي او السينمائي
احد الأسئلة اللي اتسألت كتير من كتاب السيناريو الجدد هو ازاي اكتب مكالمة تليفون بين شخصين في السيناريو بتاعي وفي الموضوع ده هانتكلم عن طرق كتابة المكالمات المختلفة وهما تلات طرق رئيسية تقدر تستخدم أي واحدة فيهم علشان تكتب مكالمة تليفونية في السيناريو بتاعك وفي اثناء ما احنا بنشرح الموضوع ده هانتكلم في شوية من الحاجات اللي المفروض تعملها او تتجنبها وانت بتكتب محادثة تليفونية
الطريقة الأولي : المكالمة الفردية ...
اول واسهل طريقة هي طريقة الشخصية الواحدة فقط وفيها بتكتب المكالمة من طرف شخص واحد وفيها الشخص بيسكت سكتات يسمع فيها الطرف التاني وبيرد بطريقة توضح اللي عالناحية التانية من الخط كان بيقول ايه وبيتكتب زي الديالوج العادي وبيستخدم ديما للمكالمات القصيرة
طبعا بديهي مش هاتحتاج تكتب تحت اسم الشخصية في تعليمات الأداء (متحدثا في التليفون) طالما انت وضحت في سطور الأكشن ان فلان رفع السماعة او مسك تليفونه المحمول .... الخ
هاتحتاج تفصل الجمل اللي بيقولها الممثل عن السكتات اللي بيسمع فيها الشخص التاني بشوية نقط ...... كده في ناس بتكتب بيت بين كل جملة والتانية كسكتة بس ده غلط وسيب الممثل يحس الموضوع ده لوحدة ويديك فيه اداء ممكن يعني لو الممثل بيقول ... لأ سوبر ماركت ايه اللي عايزني انزل له دلوقت ؟؟ وحبكت يعني كبد وقوانص الساعة اربع الفجر؟؟ معناها ان الشخص التاني علي الطرف الأخر من الخط بيقول له مثلا يلا البس وانزل السوبر ماركت هات لي كبد وقوانص
تعليمات الأداء بتبقي مفيدة جدا في حالة ما اذا كان الممثل الموجود علي الشاشة بيتعامل مع او بيكلم حد تاني معاه في المشهد غير الشخص الموجود علي الناحية التانية من المكالمة
لأ سوبر ماركت ايه اللي عايزني انزل له دلوقت ؟؟ وحبكت يعني كبد وقوانص الساعة اربع الفجر؟؟ (يلتفت لأخته الجالسة بجواره قائلا) هو اتخبط في نافوخه ده ولا بيتوحم؟؟
الطريقة الثانية : الفويس اوفر
الطريقة دي شبه اللي فوق تماما في ما عدا اختلاف وحيد هو انك بتسمع الشخصية اللي مش معانا في المشهد بتقول ايه بواسطة الفويس اوفر
بتكتب كل شخصية بأسمها وسطر حوار فيه كلامها بس الشخصية اللي مش موجودة اسمها هايبقي بعد منه قوسين بينهم حرفين في و او كابيتال
سمير (VO)
انزل السوبر ماركت هاتلي كيس كبد وقوانص دلوقت
الطريقة الثالثة : الانتر كت
لما تكون مكالمة التليفون طويلة وخوفا من انها تعمل مشاكل في التقطيع بنستخدم تكنيك الأنتر كت علشان ننط من لوكيشن للتاني بحرية ونجيب تعبيرات الممثلين وهما بيسمعوا جمل بعض أو وهما بينطقوها ونشوف المكالمة للنهاية مع الطرفين
اسهل طريقة علشان نعمل حاجة زي كده هي تأسيس احدي الشخصيات في اول لوكيشن ثم نأسس للشخصية التانية في اللوكيشن التاني طبعا ده في سطور وصف وبعد كده نضيف سطر
انتر كت – مكالمة تليفونية
INTERCUT — PHONE CONVERSATION
ونستمر في كتابة المكالمة التليفونية بعد كده كما لو كانت في لوكيشن واحد
مثال : 1
في خيار تاني هو انك تأسس للأتنين لوكيشن في ترويسة المشهد وبينهم انتركت
مثال : 2
لو هاتسألني عن اختياري الشخصي هاقول لك الخيار التاني منعا للخبطة
الطريقة الرابعة بقي هي السبليت سكرين
split screen
التكنيك ده كان مشهور قوي في الثمانينات والتسعينات بس بقي نادر حاليا استخدامه بس هانتعرف عليه علشان لو احتاجت لسبب من الأسباب استخدامه
هاتأسس في الأول ان المشهد بيحصل في مكانين زي الطريقة التالتة بالظبط وتيجي علي سطور الأكشن وتخليهم ورا بعض فاصل بينهم شرطة مايلة فقط علشان تفصل ده عن ده
مثال : 3
في النهاية حاول ماتقفلش دماغك علي تفاصيل صغيرة .. في معظم الحالات احمد زي الحاج احمد ... اهم حاجة توصل المعلومة للي بيقرأ السيناريو
اهم حاجة تتبع اسلوب واحد وتبقي متأكد انه واضح ايه اللي بيحصل قدر الإمكان
واخيرا
هل من المفترض اننا نستخدم مكالمات التليفون من اصله ولا ايه؟؟
في الحقيقة الاتجاه الرائج حاليا ان معلمي السيناريو بينصحوا كتب السيناريو الجدد بمحاولة تقليل مكالمات التليفون واستبدالها بمحادثات وجها لوجه
بس في الحقيقة انت لازم اعتمادك يكون اكتر علي القصة اكتر من نصيحة حد تاني لو قصتك تستلزم مكالمة تليفون اكنبها اهم حاجة بس تبقي واثق وفاهم انت حاططها في السيناريو ليه
تعليقات
إرسال تعليق