اللوج لاين ج1 - log line 1
تخيل كده وانت نازل من شركة انتاج سيبت لهم نسخة من السيناريو بتاعك بعد ما فشلت انك تقابل حد له مركز في الشركة واضطريت تسيب السيناريو مع عامل البوفيه مع ثقتك انه لو اتزنق في كبريت هايقطع من السيناريو بتاعك وينقل الولعة من عين لعين ولسة بتدخل الاسانسير وبتضرب بعينك جواه لقيت اكتر مخرج انت بتحبه ونفسك تشتغل معاه نازل في نفس الاسانسير ولسة قابض اخر دفعة من اجره عن فيلمه اللي خلص .. اتجرأت انت وقلت له يا استاذ انا عندي ورق حابب اعرضه عليك فسألك السؤال الشهير فيلمك بيتكلم عن ايه؟؟ ايه اللي ممكن تقوله ليه عن فيلمك خلال فترة نزول الاسانسير علشان يفضل مستينك في مدخل العمارة علي بال ما تطلع تجيب السيناريو من الفراش وتديهوله؟؟؟
- ده ما يطلق عليا الـ log line .... او سطر المدخل اللي بتغرق بيه اي حد بيسمعه وبتغريه انه يدخل تفاصيل قصتك
طبعا تلخيص فيلمك اللي بيتكون من 90 صفحة علي اقل تقدير في جملة واحدة شاملة ووافية اكيد مهمة صعبة جدا يمكن لانك عايز تقول في الجملة دي كل حاجة وشايف ان اقل تفصيلة هاتقع هاتقلل من فرصة السيناريو بتاعك انه يتقري ... وتحديد العناصر الحاسمة في قصتك والاستغناء عن اي شيء اخر مهمة قد تبدو لك للوهلة الاولي مهمة غير عادلة في حق السيناريو لكن خليك فاكر ان المدخل الجيد هو وسيلة جيدة لتجعل المخرج او المنتج او اي حد معني بقراية السيناريو عنده تشوق انه يكمله ... وعليه لازم تعرف قواعد المدخل الجيد علشان تقدر تكتب واحد كويس ومشوق لقصتك
وده ليه قواعد في الكتابة وليه شروط ومواصفات لازم تتوفر هانذكر الشروط الاول وبعد كده هاناقش بعض الامثلة لمداخل لأفلام معروفة وطريقة كتابتها
خلينا نصطلح الاول علي نسميت الـ log line بالمدخل
1- المدخل ده لازم يحتوي علي الاتي
بطل
هدف البطل
الشرير او القوة المعادية
2- ماتستخدمش في المدخل اثناء كتابته اسم الشخصية
لأنها معلومة مش مهمة ويستحسن استبدالها بصفة للشخصية
مثال : بطل سابق ذو قوي خارقة
3- استخدم صفة لأعطاء قليلا من العمق للشخصية
هي دي فرصتك لتحديد شخصية البطل ولكن لابد ان تكون حذرا من الاكلاشيهات ومن ان تجلب لك هذة الصفة السخرية من بطلك ولابد ان تكون لها علاقة وثيقة الصلة بالحبكة
مثال : بطل سابق ذو قوي خارقة وسكير
4- قدم هدف بطل الرواية بوضوح ومباشرة
الهدف هو ما يدفع احداث السيناريو الخاص بك وهو ما سيدفع مدخلك ايضا للأمام وتأكد ان هذف البطل ظاهرا بصورة مبكرة في السيناريو الخاص بك . اذا لو يكن المدخل بتاعك واعدا بما فيه الكفاية فأن بقية السيناريو بتاعك لن تتم قرائته
مثال : بطل سابق ذو قوي خارقة وسكير يبحث عن ابنته
5- اوصف خصمك
ينبغي وصف الخصم بصورة مماثلة لوصف البطل ولكن يستحسن ان يكون بشكل اقصر من وصف البطل واكثر اختصارا . لو البطل بيواجه قوة معادية اكثر شمولية وعمومية لازم توضح هي ايه تحديدا مش مجرد انه بواجه مصاعب ومطبات الحياة
مثال : بطل سابق ذو قوي خارقة وسكير يبحث عن ابنته بعد ان تم اختطافها يواسطة صديق غيور للبطل فقد عقله
هانكمل كلام عن اللوج لاين في البوست الجاي كمان
مش محتاج افكركوا تشيروا الكلام ده علشان الاستفادة تعم وكمان لو تعرف حد مهتم اعمل له منشن تحت الكلام ده علشان يقراه ويستفيد
#لوج_لاين #log_line
#موفينيل #movinel
تعليقات
إرسال تعليق