مكان كذا ده داخلي ولا خارجي؟؟
ناس كتير بتسأل نفسها وغيرها عن الموضوع ده .... كتير بنحتار البلكونة داخلي ولا خارجي .... العربية داخلي ولا خارجي ... الجراج داخلي ولا خارجي ... الجنينة داخلي ولا خارجي؟؟
خلونا في الاول نسأل نفسنا هو احنا ليه بننص في ترويسة المشهد (رأس المشهد) علي أنه خارجي ولا داخلي صبح ولا ليل
خلونا نتفق اولا أن السيناريو خطة عمل ... منتج غير نهائي .. حاجة لا تصلح للاستهلاك مباشرة ... مرحلة وسيطة بين فكرة في دماغ السيناريست وبين الفيلم اللي كل الناس بتتفرج عليه ... يبقي لازم اعمل حساب كل الناس اللي بتشتغل علي النص واللي بطبيعة الحال مش عايشين جوا دماغي كسيناريست
الناس دي بتشمل المخرج مدير التصوير مساعدين الاخراج عمال الإضاءة .... الخ
علشان كده لازم تعرف مثلا أن معدات الإضاءة لليل غير معدات الإضاءة للنهار .. هانعتمد في الليل علي الإضاءة اللي بتدي احساس ازرق في حين أننا هانعتمد في النهار علي نوعيات الإضاءة اللي بتدي احساس اصفر
وبرضه لازم تعرف أن معدات الإضاءة الداخلي بتختلف عن معدات الإضاءة الخارجي ... هانعتمد في الداخلي علي الكشافات ومنعمات الإضاءة والحواجب صغيرة الحجم في حين أن اعتمادنا الأكبر في الإضاءة الخارجي بالنهار علي العواكس والمنعمات والحواجب كبيرة الحجم وبالليل علي الكشافات الكبيرة قوي للاماكن وكشافات اصغر للممثلين
علشان كده الشخص المسؤول عن أنه يجيب معدات الإضاءة معاه كل يوم تصوير بيبقي عارف النهاردة هانصور ايه وهانصوره فين خارجي ولا داخلي ليل ولا نهار علشان يقرر هايجيب معدات ايه .. تمام كده؟؟
ياعم خلصنا كل الرغي ده ومعرفناش العربية والجنينة والبلكونة ومدخل العمارة ... الخ داخلي ولا خارجي
علشان متسألش السؤال ده بعد كده تاني اسأل نفسك المكان ده او اي مكان تاني لو التصوير بالنهار الشمس ينفع تبقي مصدر الإضاءة الأساسي فيه ولا لأ
لو اه يبقي خارجي
لو لأ يبقي داخلي
شوفت العملية سهلة ازاي؟؟
ملحوظة هامة ....
لاحظ هنا أن الموضوع موجه زيه زي كل الموقع لكتاب السيناريو يعني انت بتكتب نص لسة في خيالك ماشوفتش لوكيشن ولا عملت معاينة ولا تعرف كمية الإضاءة هاتبقي قد ايه ومصدرها في اللوكيشن الحقيقي هايكون منين ؟.. كل ده استنتاج وتوقع شخصي منك
تعليقات
إرسال تعليق