بعد ما كتاب السيناريو قرب يخلص وانا طبعا مش هاقدر اشير كل المعلومات اللي فيه هنا علشان الاقي حد يشتريه (معلش قدروا موقفي) هانتناول من هنا ورايح معلومات فيها دمج بين الكتابة والاخراج بحيث انها تفيد اللي بيكتب وفي نفس الوقت اللي عايز يخرج ويكسب لقطاته قيمة انتاجية بدون مايتكلف فلوس كتير ممكن ينفذ التقنيات اللي هايتم ذكرها في البوستات دي ... اول حاجة هانتكلم عنها هنا هي ....
لقطة العدسة الطويلة البعيدة
عدسة طويلة (ضيقة) تعمل فوكس علي هدف او شخصية رئيسية بينما يظهر من جوانب الكادر البيئة المحيطة بيهم. وده بشتغل كويس جدا لما تكون الكاميرا بعيدة عن الممثل والخلفية بعيدة هي كمان عن الممثل
في اللقطات اللي متاخدة من فيلم بوك اوف ايلاي مثلا هنلاقي ان العدسة بتضغط كل حاجة ماعدا الممثل وبتطلعهم برة الفوكس علشان كده تركيزنا بيبقي منصب تماما عليه وعلي تعبيرات وشه. حط الكاميرا بعيد عن الممثل وخلي اشياء او اشخاص اقرب للكاميرا منه. فلما انت تعمل فوكس علي الممثل كل حاجة في الكادر غيره هاتبقي اوت اوف فوكس. خلي ممثلين مقدمة الكادر يعدوا بشكل افقي قدام الكاميرا علشان تعلي الافكت. في الحالة دي الممثل مش هايبان بيمشي بسرعة ناحية الكاميرا وده بيخلينا نحس انه محتجز او بيعاني وسط عالم فوضوي. طبعا دي انت ممكن تعبر عنها بشكل ادبي في السيناريو بتاعك بحيث انك توجه فكر المخرج للقطة دي بدون ماتذكرها صراحة فتقول مثلا .. البطل يمشي بتؤدة نحونا وعلي وجهه نظرة فقدان امل بينما يتقاطع طريقه مع عدد من البشر يعبرون امامه دون ان يعيرهم أي انتباه ... مثلا
نيجي بقي للصور من فيلم بلاك سوان هانلاقي ان المخرج هنا استخدم البان بالعدسة الطويلة واختار انه يعمل بان مع الشخصية علشان يكشف مقدمة الكادر والخلفية في لقطة واحدة. الطبيعي في الحالات العادية انك بتحتاج تبدأ بلقطة واسعة علشان تؤسس المكان اللي بتدور فيه الاحداث وبعد كده بتستخدم اللقطات المتوسطة والقريبة للممثلين. بس لقطة زي دي يتم التخطيط ليها بعناية ممكن تغنيك عن مجموعة اللقطات دي كلها. هنا الكاميرا مابتعمل حاجة سوي انها بتتبع الشخصية عبر الغرفة بس بوضع ممثلين اقرب للكاميرا وممثلين تانيين بعاد في الخلفية هاتلاقي ان المشهد كله اتكشف تماما بلقطة واحدة دون الحاجة لأي لقطات اضافية. ودي انت ممكن تعبر عنها بشكل ادبي في السيناريو بتاعك بحيث انك توجه فكر المخرج للقطة دي بدون ماتذكرها صراحة فتقول مثلا .. داليا تؤدي بعض الحركات الراقصة بينما تحاكي دعاء نفس الحركات وفي اثناء الرقص نستعرض في الخلفية عدد من الراقصين يؤدون نفس الحركات .... مثلا
لما ينستخدم العدسة الطويلة (الضيقة) الخلفية بيتم جرها ناحية الجسم المراد تصويره ومقدمة الكادر بيتم ضغطها ناحية الجسم المراد تصويره. في الكادر ده من فيلم الطريق او (ذا رود) انت تقدر تشوف عناصر الخلفية والمقدمة بظهروا جوا الكادر بشكل اقرب للممثل مما هم عليه في الحقيقة. فلما انت تحط الممثل علي ناحية من الكادر بينما مقدمة الكادر بتملي الناحية التانية من الكادر ده بيخلق انطباع قوي عن بيئة المشهد بينما انت بتشد انتباه عين المشاهد للشخصية. طبعا دي انت ممكن تعبر عنها بشكل ادبي في السيناريو بتاعك بأنك بتوصف الخلفية ومقدمة الكادر والممثل بيعمل ايه وتدعي بقي ربنا ان المخرج يكون قرأ البوست ده علشان ياخد اللقطة بالشكل ده ...... او تخرج انت بقي وماتقرفناش الله؟؟ بصوت محمد ثروت
 هانتناول من هنا و…){kind=link}
تعليقات
إرسال تعليق