كتب : محمد سعد طه
كعادة أي حد مش شغال في السينما زمان لما سمعت كلمة مونتاج قالولي دا الراجل اللي بيشيل الغلطات اللي حصلت في التصوير عشان الفيلم يطلع حلو.
لما كبرت و بدأت أفهم شوية إكتشفت إن المونتاج هو السحر، و مونتير شاطر يعني فيلم حلو حتى لو عندك إخفاق في بعض الحاجات.
في المقالة دي هانتكلم سوا عن المونتاج و نشرح ازاي فعلاً المونتير الشاطر كنز.
تخيل معايا كدة عندك اللقطات دي:
١) شخص يمشي في الشارع سعيداً.
٢) نفس الشخص يمشي غاضباً.
٣) لقطة ضيقة على قشرة موزة واقعة على الأرض.
٤) نفس الشخص واقعاً على الأرض.
لو رتبنا اللقطات دي بترتيب ١ ثم ٣ ثم ٤ ثم ٢، المشاهد هايفهم إن الشخص ده كان ماشي سعيد و إتزحلق في قشرة الموز و وقع فمشي بعدها و هو غاضب.
أما لو رتبنا اللقطات دي بترتيب ٢ ثم ٣ ثم ٤ ثم ١، المشاهد هايفهم إن الشخص ده كان ماشي غاضب و إتزحلق في قشرة الموز و وقع فمشي بعدها و هو سعيد.
في الحالة الأولى الشخص تعكر بسبب إنه وقع في الأرض، أما الحالة التانية الشخص من كتر همه لما وقع على الأرض قعد يضحك، و فرق كبير طبعاً بين الموقف الأول و الموقف التاني، سواء في المعنى أو الرسالة اللي ممكن توصل للمشاهد.
و ده سر من أهم أسرار المونتاج و نقدر نسميه الحكاية، و ممكن نقول إنه ممكن يكون بيعطي للمونتير الحق في التغيير في السيناريو أصلاً، بس أكيد بعد الرجوع للمخرج.
في المقالة الجاية نحكي عن سر تاني من أسرار المونتاج
مخرج مصري مستقل
تعليقات
إرسال تعليق