أحد أهم العقبات والمشاكل اللي بتواجه الناس اللي بتكتب سواء علي المستوي الاحترافي أو حتي علي مستوي الهواية هو موضوع التوقف الإبداعي ... لما الكاتب يكون إبداعه واقف ... (بس يا حبيبي صفي نيتك خلي ربنا يبارك لنا) ... بيحصل أحيانا أن قريحتك تجف (ايه رأيك في قريحتك دي جامدة جامدة مفيش كلام) مفيش عندك افكار تشتغل عليها أو الأسوأ يكون عندك افكار عمالة تلعب في دماغك طول الوقت بس في حاجز نفسي بيمنعك من انك تشتعل كتابة فعلية علي مشروعك وياسلام بقي لو انت مرتبط بمواعيد تسليم وتجري الايام منك يوم ورا يوم وانت سوري في اللفظ عمال تتمرقع ومابتخلصش شغلك ايه الحل في ظروف زي دي؟؟؟ 

اجمع عظماء الكتابة علي حل قد يبدو للوهلة الأولي صعب جدا ولكن بقليل من التعود تقدر تطوع موهبتك وعقلك أنه يشتغل وفقا للظروف اللي انت بتفرضها عليه ... الحل بيتمثل في كلمتين ألا وهما 

 أخلق لنفسك روتين يومي في الكتابة ... اظبط منبهك علي ساعة معينة لازم تحت اي ظرف تقعد تكتب فيها ايا كان اللي هاتكتبه هاتتفاجيء بكم المشاريع اللي انت ممكن تنجزها لو التزمت بساعة كتابة يوميا الساعة دي ممكن تكون قبل ما تنام مباشرة أو اول ما بتصحي من النوم أو في وسط النهار اي وقت المهم انك تكتب وتلتزم بالساعة دي يوميا وبحسبة بسيطة لو انت بتكتب سيناريو مثلا وفي خلال الساعة دي قدرت تمشي بمعدل عشر صفحات فانت قادر تخلص سيناريو فيلم طويل في حدود تسع ايام ولو انت روائي بالمعدل ده تقدر تخلص رواية من ثلاثمائة صفحة في شهر واحد ... وهاتلاحظ انك موقفتش حياتك علي الكتابة انت بتكتب مجرد ساعة في اليوم وتقدر تستثمر باقي اليوم في التفكير في اللي هاتكتبه اليوم التالي وفكر في خطوات بسيطة كل مرة (يعني ركز تفكيرك في العشر صفحات الجاية بس مهما كان الأمر مغري انك تفكر في مناطق برة العشر صفحات دول) وبعد ما تخلص هايبقي قدامك متسع كبير من الوقت تعيد كتابة ما كتبته سابقا وصقله والمفترض أن مرحلة إعادة الكتابة تنجز فيها ضعف ما تنجزه في المرحلة الكتابة يعني لو هاتكتب عشر صفحات في اليوم فانت قادر بمنتهي السهولة انك تعيد كتابة عشرين صفحة يوميا وخلي يوم فري كده زي الرجيم بين كل مرحلة والتانية أو بين كل عمل والتاني ... افصل فيه من كل حاجة وأخرج وقابل اصحابك .... الخ ومن خلال تجربتي الشخصية ولأن الإنسان بطبعه عاشق للمرقعة تعامل مع الموضوع كأنه واجب في المدرسة ... واعمل لنفسك حد ادني وحد أقصي وليكن مثلا حد ادني تمن صفحات في اليوم وحد أقصي اتناشر صفحة لو وصلت للحد الادني فا انت تمام وبيس وزي الفل لو وصلت للحد الاقصي كافيء نفسك بقي يا نجم بأي حاجة انت بتحبها شوكلاتاية حجر قص هالقهوة ساندوتش شاورما من ابو مازن ... اي حاجة تخلق جواك الحافز انك تستمر في عملية الكتابة المؤلمة وفي النهاية حابب اقولك أن التفكير في الكتابة فقط لا يؤدي لاي انتاج علي الاطلاق في حين أن عملية الكتابة نفسها هاتؤدي لوجود ناتج مهما كان مستواه متواضع فبقليل من الصقل والتعديل من الممكن أن تصنع منه شيء ..... يلا تتمسوا بالخير ودمتم مبدعين 

#محمود_ابو_العلا 

#movinel