في ناس كتير بتسأل عن المعالجة السينمائية وايه طريقة كتابتها وانواعها
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
المعالجة المفترض انها بتتكتب كمرحلة سابقة علي كتابة السيناريو كخطة عمل علشان الاحداث ماتخرجش عن الاطار اللي المفروض انها تمشي فيه ومنعا للتوهات او الرايتر بلوك في منتصف عملية الكتابة بس مش كل الناس بتشتغل كده وفي ناس بتكتب المعالجة بعد ما بتخلص كتابة سيناريو والاتنين اسس كتابتهم واحدة الفرق الوحيد انك في الحالة الاولي بتكتب احداث حادثة في القصة فعلا في حين انك في الحالة التانية بتقوم بتأليفها واختلاقها علي الهواء مباشرة
المعالجة نوعين - معالجة الصفحة الواحدة - معالجة الاربع صفحات - معالجة العشرين صفحة
معالجة الصفحة الواحدة
معالجة الصفحة الواحدة واللي بيطلق عليها برضه الملخص بيبقي فيها الموضوع عبارة عن كتابة احداث الفيلم بطريقة الحكي من غير حوار مع ذكر اسامي الابطال وصفاتهم الاساسية وكنههم جوا الاحداث وعدم ذكر الابطال الثانويين مع ذكر كنههم جوا الاحداث لو مهمين ومحوريين وبيترتب عليهم احداث في القصة
وبتحاول تذكر جوانب قوة القصة والاحداث المثيرة فيها
وتجنب ارباك القاريء بالعديد من الاسماء لشخصيات مش هايقدر يتواصل معاها او يتذكرها
معالجة الاربع صفحات
نيجي بقي لمعالجة الاربع صفحات
دي محاولة لتجميع احداث الفيلم في اطار اكثر تنظيما ووضع خريطة اكثر تفصيلا للأحداث يفترض ان تساعدك علي كتابة احداث الفيلم لو لم يكن قد تمت كتابته فعليا بعد ودي لها طريقة محددة في كتابتها بيستحسن انك تمشي عليها علشان توضح للي بيقرا انك محترف مش مجرد هاوي
الطريقة دي بتكون كالاتي
- النص صفحة الاولي ملخص بطريقة الحكي لمشهد او مجموعة مشاهد بداية الفيلم
النص صفحة التانية ملخص احداث الفصل الاول بطريقة الحكي
- النص صفحة التالتة ملخص احداث نقطة الحبكة الاولي بطريقة الحكي
- بعد كده في ورقة خارجية بتكتب اهم ثلاث مشاكل واجهت البطل في خلال رحلته وازاي قدر يتغلب عليهم ومن الورقة الخارجية دي بتكتب ملخص احداث الفصل التاني في ورقة كاملة
بعد كده نص صفحة فيها ملخص احداث نقطة الحبكة الثانية بطريقة الحكاية
- بعد كده نص صفحة ملخص احداث الفصل التالت للحدوتة بطريقة الحكاية
واخيرا النص صفحة الاخيرة ملخص بطريقة الحكي لمشهد او مجموعة مشاهد نهاية الفيلم
كده يبقي عندك اربع صفحات فيهم شاسيه الفيلم اللي انت شديت عليه الفكرة
علشان ناخد امثلة مشهورة للحاجات المكتوبة فوق البداية والنهاية والوسط ونقاط الحبكة وكده اقرب مثال هانشتغل عليه مثلا حياة الرسول صلي الله عليه وسلم
مشاهد البداية ممكن تتضمن ازاي قرر عبد المطلب انه يضحي بعبد الله ابو الرسول وازاي عمل قرعة وفداه ب100 ناقة وازاي اتولد الرسول صلي الله عليه وسلم مثلا
الفصل الاول هو حياة الرسول قبل الدعوة
نقطة الحبكة الاولي هي نزول الوحي علي رسول الله
الفصل التاني هو دعوة الرسول لكفار مكة .. المصاعب اللي تعرض لها الرسول هي مثلا عام الحزن - تعذيب الكفار لأصحابه - هزيمة احد مثلا
نقطة الحبكة التانية هي فتح مكة
الفصل التالت هو الاحداث اللي حصلت بعد فتح مكة لحين موعد وفاة الرسول
احداث النهاية هي الاحداث والمأثورات اللي حصلت ساعة وفاة الرسول
معالجة العشرين صفحة
بنيجي بقي بعد كده لمعالجة العشرين صفحة واللي بيطلق عليها احيانا التتابع ودي بيتم كتابتها عن طريق تلخيص كل مشهد من مشاهد السيناريو بطريقة الحكاية في أربعة سطور تشرح فيهم المشهد وما يحدث فيه والغرض من وجوده في السيناريو في عجالة حتي تصل فكرة كاملة لمن يقرأ هذا المعالجة عن السيناريو بأكمله في حيز زمني ضيق
تعليقات
إرسال تعليق