هل مطلوب مني ككاتب سيناريو وخصوصا كتاب الدراما التليفزيونية أن انتهي من كتابة حلقات المسلسل بالكامل قبل البدء في تسويقه أو اعمل علي تسويقه العمل وهو مجرد فكرة وليدة لم يتم العمل عليها وكتابتها في شكل سيناريو
قبل ما نبدأ في موضوعنا حابب أعلن عن أن موقع موفينيل بقي له تطبيق علي الاندرويد تقدر تتابع عليه كل المواضيع علي الموقع بمنتهي السهولة ... لو عايز تحمل التطبيق تقدر تحمله من هنا
ردا علي نقطة تثار حاليا وتقريبا تثار كل رمضان .... يا جماعة محدش بيكتب مسلسل كامل بدون مايكون ضامن تسويق للعمل ومعظم اللي بيعمل كده بيركن عمله ومابيتعملش لأن السوق عايز حد مستغني مش عايز حد يدلل علي شغله .....
طيب امال نعمل ايه؟؟
الطبيعي والصح أننا بنعمل معالجة وملف كويس ومحترم للعمل ونكتب من تلات لخمس حلقات حسب موضوع المسلسل ونبدا نسوق ... وبعد ما يتم التعاقد علي العمل أو علي الاقل موافقة مبدئية علي المعالجة بتبعت الحلقات وبعد كده يتم التعاقد والاتفاق علي مواعيد تسليم الحلقات والدفعات وبيشتغل فريق الانتاج علي تفريغ الحلقات اللي بيستلمها تباعا لحين تسليم جميع الحلقات
كون بقي شركة الإنتاج تفتكر فجأة انها داخلة مسلسل لرمضان قبل الشهر الكريم بتلات اربع شهور وتبدأ السريعة وتشتغل علي المسلسل وهي ما استلمتش غير خمس حلقات ولم تنتظر لما يتم تسليم باقي الحلقات ده شأنها هي مش مسؤلية المؤلف
لكن بحسب بسيطة أن واحد يبذل مجهود في كتابة من ٩٠٠ الي ١٢٠٠ صفحة في مشروع قد يجد له تسويق أو لا يجد وبنسبة كبيرة جدا في معظم الأحوال سيتم إعادة كتابته أما لتغيرات تكنولوجية أو لاختلاف وعي الكاتب أو للعمل علي النص من خلال وجهة نظر المخرج أو وجهة نظر الإنتاج ... الخ
علشان كده ديما بقول للناس المجهود اللي هاتبذله علشان تخلص فيه مسلسل يكون مكتوب بالكامل علشان تبدأ تسوقه استثمره في ست مسلسلات تكتب من كل واحد فيهم خمس حلقات واهو يبقي عندك تنوع لأن العملية عند مستوي معين من الحرفة في الكتابة بتبقي خاضعة لاذواق المخرج والمنتج ونجم العمل الخ
تعليقات
إرسال تعليق