الافكار الهاي كونسبت (ذات الفرضية الجيدة) ولا الافكار اللو كونسبت (ذات الفرضية العادية)

 الافكار الهاي كونسبت (ذات الفرضية الجيدة)  ولا الافكار اللو كونسبت (ذات الفرضية العادية)  

يعني ايه الاول افكار هاي كونسبت او لو كونسبت ؟؟ 

الفكرة علشان تكون ذات فرضية جيدة محتاجة تلات حاجات 

• فرضية واضحة 

• وان الفرضية دي تكون مرتبطة ب ومدفوعة بالحبكة 

• وان الفرضية دي يسهل عرضها 

بينما تميل الافكار ذات الفرضية العادية الي ان تكون مرتبطة بالشخصية اكتر من ارتباطها بالحبكة او بعوامل الجذب الحكائية 

هاتقدر تميز بين النوعين ازاي بطريقة بسيطة ومن الثواني الاولي لعرض الفكرة عليك؟؟ 

القصة جيدة الفرضية ديما بتحتوي في اولها علي جمل زي  

• تخيل عالم بيحصل فيه كذا او قواعد العيشة فيه كذا ... الخ 

• الفكرة عبارة عن تقاطع عالم كذا مع عالم كذا .. 

ايه الكلام الغريب ده؟؟ اتقل عليا خليني اديلك امثلة تفهم منها اكتر 

- تخيل عالم بيتبادل فيه الناس سنوات حياتهم بدلا من استخدام النقود ... in time

- تخيل طفل بيتم القبض عليه نتيجة تشابه اسمه مع اسم احد المجرمين .... خالاويص  

خلاصة الكلام الفكرة الهاي كونسبت بالبلدي كده هي فكرة جديدة .. واضحة .. بياعة من الوهلة الاولي .. سهلة انك تشرحها لحد في كلمات بسيطة .. بنسبة كبيرة هاتلاقيها ما اتعملتش قبل كده .. او حتي لو اتعملت فا انت هاتبقي بتبص لها من منظور جديد تماما 

بعض النصايح عشان تطلع فكرة ذات فرضية جيدة 

1. اعمل فرضية سهلة الشرح بحيث انك لو اتزنقت في شرح الفكرة لحد ما تحتاجش اكتر من تلات جمل لو لقيت نفسك مش قادر تعمل كده اشتغل تاني علي الفكرة وبسط مفهومها اكتر 

2. اشتغل في قصتك علي الانماط المتعارف عليها بحيث انك تجي حاجة الناس تحس معاها انها مألوفة بس مازالت طازجة غير مستهلكة 

3. اعرض قصتك ذات الفرضية الجيدة بحكي روائي جيد .. انت ممكن يكون عندك اجمد قصة في الدنيا ولكن بدون تطوير شخصية وبناء عالم حي وحكي واضح .... الخ الدنيا هاتقع منك لا محالة لان الفرضية ببساطة شوية جمل قليلة لكن تطوير شوية الجمل دي لرواية او لفيلم بيتطلب مجهود كبير ولازم يحتوي علي حاجات كتير زي الشخصية الرئيسية الدقيقة والقصةالدافعة للسرد والسرد المقنع للقارئ او المشاهد 

ايه بقي مميزات وعيوب انك تعمل فكرة ذات فرضية جيدة؟؟؟ 

عيوب ايه يا عمنا هو حد يطول؟؟ 

اتقل عليا ... اي حاجة في الدنيا ممكن يظهر لها عيوب في مصر امال ايه 

نبدأ الاول بالمميزات 

اهم ميزة في الافكار ذات الفرضية الجيدة انها صعب جدا تتسرق منك سجلها وامشي وزعها عالناس في الاتوبيسات وانت متطمن محدش هايسرقها ولو حاول يغير في الفكرة شوية ويجتهد في السرقة يا اما يطلع بحاجة جديدة تماما يا اما مش هايبعد عن فكرتك خالص ولو وصله غباءه انه يعمل كده هاتقدر بنسبة كبيرة انك تثبت حقك في حين ان الافكار ذات الفرضية العادية بيقي في شبها كتير وسهل اللي يسرقها انه يهرب بدون مسائلة 

اما ابرز العيوب (في مصر) بقي ايه ان الانتاج ديما بيحب يلعب علي المضمون وممكن تميز فكرتك وعدم وجود شبيه لها يخوف الانتاج انه ياخد المخاطرة بانتاجها وتفضل حبيسة الادراج لسنين 

في النهاية نصيحة لأي كاتب سيناريو 

لازم يكون عندك افكار من النوعيتين بعضها عادي الفرضية بتسعي بيهم وانت حاطط في اعتبارك انها لو اتسرقت مش هاتزعل عليها بس اقرب لعقلية الانتاج في مصر وبعضها ذو فرضية جيدة بتقدمه وانت عارف انه صعب يتقبل بس لو اتقبل ونجح هايحطك في حتة من السوق مفيش فيها حد غيرك ولنا في حد زي محمود ابو زيد قديما ومحمد امين راضي حاليا اسوة حسنة ... 

اخيرا ماتنساش تشير البوست وتعمل ريأكشنك الجميل عالبوست وتعلق لو حابب نتناقش في حاجة والي اللقاء في بوستات تانية تخص كتابة السيناريو 

#جميع_الحقوق_محفوظة